پارتی بارەگاکانی لە کەرکووک وەردەگرێتەوە

 

بەگوێرەی زانیارییەکانی رووداو، سبەی یەکشەممە، 05-11-2023، پارتی دیموکراتی کوردستان بە ئامادەبوونی شاخەوان عەبدوڵڵا، جێگری دووەمی سەرۆکی پەرلەمانی عێراق و محەممەد کەمال، بەرپرسی لقی سێی پارتی بارەگاکانی وەردەگرێتەوە. 

 

هەر بەپێ زانیارییەکان، پارتی دیموکراتی کوردستان ئەنجوومەنی سەرکردایەتی کەرکووک-گەرمیانیش وەردەگرێتەوە و پێشکێشی زانکۆی کەرکووکی دەکات. 

 

وەرگرتنەوەی بارەگاکان دوای ئەوە هات محەممەد شیاع سوودانی، سەرۆکوەزیرانی عێراق بڕیاریدا بە گەڕانەوەی سەرجەم ئەو بارەگا و خانووانەی پێشتر پارتی دیموکراتی کوردستانی تێدابوون و دوای رووداوەکانی 16ـی ئۆکتۆبەری 2017 ئەوانی تێدا نەماون. 

 

دوای بڕیارەکەی محەممەد شیاع سوودانی، رۆژی یەکشەممە، 3-9-2023، دادگەی باڵای فیدڕاڵی رایگەیاند کۆبوونەوەکەیەکی راوێژکاریی لەبارەی بڕیارەکە دەستپێکرد و بە ماوەیەکی کاتی بڕیارەکەی راگرت. 

 

رووداو زانیویەتی، دوای تەواوبوونی ئەو کاتەی دادگەی فیدراڵی عێراق بۆ بڕیارەکەی سەرۆکوەزیرانی عێراق دەریکردبوو، فەرمانەکە چووەتە بواری جێبەجێکردن و سبەی پارتی لە بارەگاکەی لە کەرکووک دەست بە کار و چالاکییەکانی دەکات.