پۆلیسی کەرکووک: کچێک بە چەکی کڵاشینکۆف باوکی خۆی کوشت

رۆژی سێشەممە، 04-07-2023، عامر شوانی، گوتەبێژی پۆلیسی کەرکووک بە تۆڕی میدیایی رووداوی گوت، رووداوەکە لە گوندێکی سەر بە ناحیەی شوان روویداوە، کچێکی تەمەن 15 بۆ 16 ساڵ، بە چەکی کلاشینکۆف باوکی خۆی کوشتووە.

 

کچەکە دوای رووداوەکە لەلایەن پۆلیسەوە دەستگیرکراوە، پۆلیس لێکۆڵینەوەی لەگەڵدا دەکات.

 

دوای رووداوەکە وا بڵاوکرایەوە کە باوکەکە لە شیرینیی خەودا کوژراوە، بەڵام گوتەبێژی پۆلیسی کەرکووک دەڵێت، هێشتا ئەوە روون نەبووەتەوە.

 

سەبارەت بە هۆکاری رووداوەکەش، عامر شوانی، گوتەبێژی پۆلیسی کەرکووک گوتی، کوشتنەکە لەسەر کێشەیەکی کۆمەڵایەتی بووە، بەڵام پۆلیس سەرقاڵی لێکۆڵینەوەیە بۆ ئەوەی هۆکاری تەواوی رووداوەکەی بۆ دەربکەوێت.