لە ئامەد بوومەلەرزەیەک بە گوڕی 4.2 پلەی رێختەر روویدا

سەرۆکایەتیی کارەساتی لەناکاو و فریاگوزاریی تورکیا - ئافاد بڵاویکردەوە، کاژێر 01.25 خولەکی بەرەبەیانیی ئەمڕۆ یەکشەممە 4-6-2023 بوومەلەرزەیەک بەگوڕی 4.2 پلەی رێختەر لە شارۆچکەی شانگوش سەربە پارێزگای ئامەد تۆمارکراوە. بەگوێرەی ئافاد، بوومەلەرزەکە لە قووڵایی 7 کیلۆمەتر بووە. 

 

تاوەکو ئێستا هیچ زانیارییەک لەبارەی زیانی بوومەلەرزەکە بڵاونەکراوەتەوە. 

 

دوای بوومەلەرزەکانی 6ی شوباتی ئەمساڵ کە بە گوڕی 7.7 و 7.6 پلە لە دوو شارۆچکەی پارێزگای مەرەش روویاندا و زیانی بە هەشت پارێزگای باکووری کوردستان و سێ پارێزگای تورکیا گەیاند، تاوەکو ئێستا 33 هەزار و 77 پاشلەرزە تۆمارکراون. 

 

وەزیری ناوخۆی تورکیا رۆژی 14ـی نیسانی 2023 رایگەیاند، ژمارەی گیانلەدەستدان بەهۆی بوومەلەرزەکانەوە بۆ 50 هەزار و 500 کەس بەرزبووەتەوە. 

 

بوومەلەرزەکان کاریگەری گەورەیشیان لەسەر رۆژئاوای کوردستان و سووریا هەبوو و نزیکەی 6 هەزار کەسیش لەوێ گیانیان لەدەستدا.