شەپۆلێکی سەرما و بەفربارین پارێزگاکانی باکووری کوردستانی گرتووەتەوە

 

بەرەبەیانی ئەمڕۆ یەکشەممە، 3ـی کانوونی یەکەمی 2023، لە ئەرزەڕۆم پلەکانی گەرما بۆ خوار شەش پلەی سیلیزی دابەزیون، سەرما و ئەو دابەزینی پلەی گەرمییە کاریگەری لەسەر ئۆتۆمبێلەکان هەبووە جامەکانیان بەستوونی. 

 

پارێزگای ئاگری لە باکووری کوردستان تەمێکی چڕ ناوچەکەی گرتووە و ئەو شەپۆلە سەرمایە کاریگەری لەسەر ژیانی هاونیشتمانییان دروستکردووە.

 

لە شارۆچکەی ساریکامی سەر بە پارێزگای قەرس پلەکانی گەرما دابەزین و بەهۆی سەرماوە، جامی ئۆتۆمبێلەکان بەستوونی و دۆڵی کەکلیک و ناوەندی خلیسکێنەی جیبیلی تەپە، سپیپۆش بوون.

 

هاوشێوەی پارێزگاکانی دیکە لە ئەردەخان شەپۆلە سەرماکە کاریگەری لەسەر ئۆتۆمبێل و هاتووچۆی هاونیشتمانییان دروست کردووە و چینێکی تەنکی شەختەش لەسەر رووباری کورە دروستبوو. 

 

بەگوێرەی پێشبینییەکانی بەڕێوەبەرایەتیی گشتیی کەشناسیی تورکیا، بەهۆی شەپۆلی سەرما و سۆڵە، لەم چەند پارێزگایەی باکووری کوردستان لە 24 کاژێری داهاتوودا 12 پلەی گەرما دادەبەزێت و بەمەش لە باشترین دۆخدا پلەی گەرما لە نێوان چوار تا حەوت پلەی ژێر سفری سەدی تۆمار دەکات.