کاروباری کۆمەڵایەتی: 446 کەس لە چاکسازییەکانی هەرێمی کوردستان بڕیاری لەسێدارەدانیان هەیە

 

ئیحسان عەبدولڕەحمان، بەڕێوەبەری گشتیی چاکسازییەکانی هەرێمی کوردستان بە تۆڕی میدیایی رووداوی راگەیاند، "بڕیارمانداوە چاکسازییەکی نوێ لە قەزای کفری بکەینەوە و هەوڵەکانمان بۆ ئەوەیە کە ئەم مانگە هەموو کارەکان تەواو بکەین، چونکە شوێنمان دیاریکردووە و نزیکەی 200 فەرمانبەرمان دەوێت کە ئێستا نزیکەی 50ـمان هەیە."

 

لە هەرێمی کوردستان سێ چاکسازیی گەوران لە شارەکانی هەولێر، سلێمانی و دهۆک هەن. هاوکات سێ چاکسازیی ژنان و منداڵان لە هەرسێ شارەکەدا هەن. ئیحسان عەبدولڕەحمان گوتی، "چاکسازییەکان قەرەباڵخ بوون، بۆیە هەوڵدەدەین چاکسازیی گەورانی نوێ بکەینەوە، کە لە قەزای کفری کرایەوە، ئەو کەسانەی خەڵکی ئەو سنوورەن و لە چاکسازییەکانی دیکەن، دەگوازرێنەوە بۆ ئەو چاکسازییە". ،گوتیشی کار دەکەن لە سۆرانیش چاکسازییەکی دیکە بکەنەوە.

 

لەبارەی ئامارەکانی ئەو کەسانەی سزادراون و لە چاکسازییەکانن، ئیحسان عەبدولڕەحمان باسی لەوە کرد، "بەگوێرەی دوایین ئامار، لە هەر شەش چاکسازییەکان پێنج هەزار و 91 کەس هەن کە 446 کەسیان بە لەسێدارەدان سزادراون و 1038 کەس بە مادەی هۆشبەر سزادراون."

 

بە گوتەی ئیحسان عەبدولڕەحمان، لە چاکسازیی گەورانی هەولێر 1707 سزادراو، سلێمانی 1455 و دهۆک 1403 سزادراو هەن، لە چاکسازیی ژنان و منداڵان دهۆک 103 بەندکراو؛ لە هەولێر 300 و لە سلێمانی 123 بەندکراو هەن.