باوک و کوڕێکی کورد لە بەریتانیا دەسووتێن و گیان لەدەستدەدەن

 

 

رۆژی دووشەممە 03-07-2023 هەوراز کاکل، خزمی نزیکی نیعمەت لاوە بە تۆڕی میدیایی رووداوی گوت، "کاژێر 12:00ی شەوی شەممەی رابردوو ئاگادارکراینەوە کە کاژێر 4:00ی ئێوارەی رۆژی شەممە 1ی ئەم مانگە بە کاتی بەریتانیا نیعمەت و منداڵێکی لە نهۆمی دووەمی ماڵەکەیان سووتاون."

 

هەوراز کاکل گوتیشی، "نیعمەت دوای ئەوەی ژیانی هاوژینیی پێکهێنا، چووە بەریتانیا و نزیکەی 20 ساڵ دەبوو لەو وڵاتە دەژیا و هەر لەوێ سێ منداڵی بە ناوەکانی محەممەد، لارە و لاوە بوو."

 

ماڵی نیعمەت دوو نهۆمییە. بە گوتەی هەوراز کاکل، محەممەدی کوڕی نیعمەت بە تەنیا لە نهۆمی دووەمی ماڵەکەیان بووە و دەگوترێت "چەرخی پێ بووە، رەنگە بەو هۆیەوە ئاگرەکە کەوتبێتەوە و ماڵەکەیان سووتا بێت"، بەڵام تائێستا هۆکاری ئاگرەکە بە روونی دیار نییە و پۆلیسی بەریتانیا لەوبارەیەوە هیچی نەگوتووە.

 

هەوراز کاکل دەڵێت، "کاتێک ئاگرەکە لە نهۆمی دووەمی ماڵەکە کەوتووەتەوە، نیعمەت لە گەرماو بووە و هاوژین و منداڵەکانی دیکەیان لە نهۆمی یەکەم بوون و ئاگاداری ئاگرەکە نەبوون. دراوسێیەکی خۆیان ئاگاداریانی کردووەتەوە و باوکی منداڵەکە راستەوخۆ لە گەرماو چووەتە دەرەوە و چووەتە نهۆمی دووەم بۆ رزگارکردنی منداڵەکەی، بەڵام ئاگرەکە هێندە بەهێز بووە، منداڵەکەی نەدۆزیوەتەوە و خۆیشی سووتاوە."

 

ئێستا هاوژینی نیعمەت و منداڵەکانی لە نەخۆشخانەن لە وڵاتی بەریتانی و دۆخی تەندروستییان خراپە. هەوراز کاکل دەڵێت، "بڕیارە تەرمی نیعمەت و کوڕەکەی بگەڕێننەوە و لە هەولێر بەخاک بسپێردرێن، بەڵام رێکارەکانی گەڕانەوەی تەرمەکان تەواو نەبووە و 10 رۆژی پێویستە."