وەزارەتی کارەبا: سووتانی دووکانەکانی گەڕەکی نەورۆز بەهۆی پێوەری زیرەکەوە نەبووە

 

 

ئەمڕۆ سێشەممە، 2-11-2021، وەزارەتی کارەبای هەرێمی کوردستان روونکردنەوەیەکی بڵاوکردەوە و رەتیدەکاتەوە ئەو چەند دووکانەی لە چەند رۆژی رابردوو لەگەڕەکی نەورۆز سووتان و بەهۆی پێوەری زیرەکەوە بووبێت.

 

لە روونکردەوەکەدا هاتووە: "لیژنەی راسپێردرا بۆ دەستنیشانکردنی هۆکاری ئاگرکەوتنەوەیەک لە چەند دووکانێکی گەڕەکی نەورۆز لە هەولێر، ئەنجامی بەدواداچوون و لێکۆڵینەوەیان خستەڕوو، بە مەبەستی بەدواداچوون بۆ ئەو دووکانانەی سووتابوون، سەردانی شوێنەکەمان لە گەڕەكی نەورۆز کرد، بۆمان دەرکەوت کە پێوەرەکان نەسووتابوون و کار دەکەن".

 

هەروەها هاتووە: "هیچ شوێنەواری سووتان لەناو بۆردەکە دیار نییە و هەر چوار پێوەرەکە نەسووتاون و هەردوو سێرکێتەکان سەلامەتن و لە ئەنجامدا بۆمان دەرکەوت هۆکاری ئاگرکەوتنەوەکە پەیوەندی بە پێوەری زیرەکەوە نییە کە لە ستوون بەستراون و هۆکاری لەناو دووکانەکانە".

 

وەزارەتی کارەبای هەرێمی کوردستان ئەوەش رووندەکاتەوە لە کاتی سووتانی ئەو دووکانانە: "دەنگۆی چەواشەکارانە سەبارەت بە هۆکاری ئاگرکەوتنەوەکە لە پەیجەکانی سۆشیاڵمیدیا بڵاوکرابووەوە، بۆیە رێوشوێنی یاسایی بەرانبەر ئەو کەسانە دەگرێتەبەر کە هەواڵی چەواشەکارانە لە دژی خزمەتگوزارییەکانی کارەبا بڵاویان کردووەتەوە".