کۆماندۆی کوردستان: چەکدارێک لەنزیک فڕۆکەخانەی سلێمانی دەستڕێژی گولـلەی لە ئۆتۆمبێلێک کرد
رووداو دیجیتاڵ
بەڕێوەبەرایەتیی راگەیاندنی فەرماندەیی کۆماندۆی کوردستان دەڵێت، چەکدارێکی نەناسراو لەنزیک فڕۆکەخانەی سلێمانی دەستڕێژی گولـلەی لە ئۆتۆمبێلێک کردووە و کەسێکی بریندار کردووە؛ لەو کاتەیشدا کارمەندێکی کۆماندۆ بەو شەقامەدا تێپەڕیوە و کەسی تەقەکەری دەستبەسەر کردووە.
رۆژی یەکشەممە 02-07-2023 بەڕێوەبەرایەتیی راگەیاندنی فەرماندەی کۆماندۆی کوردستان رایگەیاند، "چەکدارێکی نەناسراو لەنزیک فڕۆکەخانەی سلێمانی دەستڕێژی گولـلەی لە ئۆتۆمبێلێک کردووە و کەسێکی بریندار کردووە؛ لەو کاتەدا کارمەندێکی هێزەکانی کۆماندۆ لە شوێنی رووداوەکە دەبێت و دەیەوێت رێگری لە تەقەکەرەکە بکات، بەڵام کەسی تەقەکەر رووبەڕووی کارمەندەکەی کۆماندۆش بووەتەوە و تەقەی زیاتری کردووە."
بەگوێرەی راگەیێندراوەکە، کەسی تەقەکەر لەلایەن ئەو کارمەندەی هێزی کۆماندۆوە چەک کراوە و چەکەکەی لێسەندراوە، بەڵام تاوەکو هێزە ئەمنییەکان گەیشتوونەتە شوێنی رووداوەکە، ئەو کەسە بەرەو شوێنێکی نادیار هەڵاتووە.
کۆماندۆی کوردستان دەڵێت، چەکی تەقەکەر لەبەردەست هێزەکانیاندایە و هێزە ئەمنییەکان سەرقاڵی دۆزینەوەی تۆمەتباری رووداوەکەن، ئاماژە بەوەش دەکات، ئەو رووداوە دوور و نزیک پەیوەندیی بە کارمەندەکەی هێزی کۆماندۆوە نەبووە و "تەنیا وەکو ئەرکێکی ئەخلاقی و پیشەیی رێگریی کردووە لە ئەنجامدانی تاوانێکی گەورە."
ئەرکان عەلی، پەیامنێری رووداو لە سلێمانی رایگەیاند، رووداوەکە پێش نیو کاژ‌ێر لە شەقامی سەرەکیی سلێمانی - تاسڵوجە نزیک لە فڕۆکەخانەی نێودەوڵەتیی سلێمانی روویداوە، لە ئەنجامی دەستشکاندنەوەی شۆفێری دوو ئۆتۆمبێلی مەدەنی بووە کە دەمەقاڵێ لەنێوانیان دروستبووە، یەکێک لە شۆفێرەکان چەکی پێبووە و دابەزیوە دەستی شکاندووەتەوە بەردەم ئۆتۆمبێلەکەی دیکە و تەقەی لە شۆفێرەکە کردووە و برینداری کردووە.
بەپێی زانیارییەکانی پەیامنێری رووداو، دوای ئەوەی دەمەقاڵێ لەنێوان هەردوو شۆفێر دروستبووە و کەسێکیان تەقەی کردووە، قەرەباڵخی لە شەقامەکە دروستبووە و لەو کاتەدا کارمەندێکی هێزەکانی کۆماندۆ بەو شەقامەدا تێپەڕ بووە و داوای کردووە کۆتایی بە شەڕەکە بهێندرێت و شەقامەکە چۆڵ بکەن، بەڵام کەسی تەقەکەر رووبەڕووی کارمەندەکەی کۆماندۆش بووەتەوە و تەقەی کردووە، ئەویش چەکەکەی لێ سەندووە.