لە سنووری سنە کۆڵبەرێک کوژرا

 

 

بەپێی رێکخراوەکانی مافی مرۆڤی رۆژهەڵاتی کوردستان، رۆژی چوارشەممە 01-05-2024 هێزە ئەمنییەکانی کۆماری ئیسلامی ئێران لە سنووری شاری سەقز تەقەیان لە ژمارەیەک کۆڵبەر کردووە و بەهۆیەوە کۆڵبەرێک بە ناوی هێمن ئەحمەدی، تەمەن 45 ساڵ کوژراوە. 

 

کۆڵبەرەکە خەڵکی گوندی "کارێزە"ی سەر بە شاری سەقزە و لە ناوچەی سنووریی بەسامی شارەکە تەقەی لێکراوە و کوژراوە. 

 

رێکخراوی هەنگاو بۆ مافەکانی مرۆڤ رایگەیاندووە: "ئەو کۆڵبەرە لە مەودای یەک مەتری و بە چەکی کڵاشینکۆف تەقە لە سک و نزیک دڵی کراوە."

 

بەپێی زانیارییەکان، هێمن ئەحمەدی خێزاندارە و باوکی کچێکی تەمەن هەشت ساڵانە.

 

تەنیا لە مانگی نیسانی ئەمساڵدا لانیکەم چوار کۆڵبەر لە سنوورەکانی رۆژهەڵاتی کوردستان کوژراون و 33 کۆڵبەریش بریندار کراون. 

 

لە مانگی ئاداری ئەمساڵیشدا، لانیکەم 13 کۆڵبەر و کاسبکار گیانیان لەدەستداوە کە چوار کەسیان بە تەقەی هێزە ئەمنییەکانی ئێران، چوار کەس بەهۆی کەوتنەوە لە بەرزاییەکانەوە، دوو کەس بەهۆی رەقبوونەوە، کەسێک بە جەڵتەی دڵ و دوو کەس بەهۆی رووداوەکانی هاتووچۆ بووە. هەروەها لەو مانگەدا 78 کۆڵبەریش بریندار بوون.

 

بەپێی راپۆرتی رێکخراوەکانی مافی مرۆڤ، لە ساڵی 2023 لانیکەم 32 کۆڵبەر گیانیان لەدەستداوە، 307 کۆڵبەر بریندار بوون و دوو کۆڵبەری دیکەش بێسەرشوێن بوون.