لە مێرسین چوار کەس بەتۆمەتی بانگەشەکردن بۆ پەکەکە دەستگیرکران

 

 

ئۆپەراسیۆنەکە بەرەبەیانی ئەمڕۆ هەینی 1ـی کانوونی یەکەمی 2023 لەسەر راسپاردەی سەرۆکایەتیی داواکاری گشتیی مێرسین دەستیپێکرد، دوای ئەوەی بە تۆمەتی بانگەشەکردن بۆ پەکەکە لە تۆڕە کۆمەڵایەتییەکاندا و بەشداریکردن لە چالاکییەکانی کۆبانێ لە ساڵانی 2014 و 2016دا بڕیاری دەستگیرکردنی بۆ چوار کەس دەرکرد. 

 

60 کەس لە تیمەکانی هۆبەی بەرەنگاربوونەوەی تیرۆری سەر بە بەڕێوەبەرایەتی گشتیی پۆلیسی مێرسین و پۆلیسی پارێزگاکە، بەرەبەیانی زوو بە گرتنەبەری رێوشوێنی ئەمنیی تووند، هەڵیانکوتایە سەر چەندین ماڵ کە پێشتر دەستنیشان کرابوون و دوای شکاندنی دەرگای ماڵەکانیان چوونە ژوورەوە. 

 

لە ئۆپەراسیۆنەدا کە فڕۆکەی بێفڕۆکەوان بەکارهێنرا، چوار داواکراوەکە دەستگیرکران و لە بەڕێوەبەرایەتی گشتیی پۆلیس لێکۆڵینەوەیان لەگەڵدا دەکرێت. 

 

لە باکووری کوردستان و تورکیا، هێزە ئەمنییەکان بە پاساوی "پەکەکە" ماوە ماوە هەڵدەکوتنە سەر ماڵان، هاونیشتمانیان و سیاسەتڤانانی کورد دەستبەسەر دەکەن. بەشێک لەوانەی دەستگیردەکرێن ئەندام و لایەنگری هەدەپ و هەدەپەن.