لێکۆڵینەوەیەک: هەژاری پیربوونی مێشک خێراتر دەکات

 

 

زانایان گەیشتوونەتە ئەو ئەنجامەی کە پەیوەندی لەنێوان کەمیی داهات و لەنێوچوونی خێرای ئەو مادە سپییەدا هەیە کە لە مێشکماندایە. بە تێپەڕبوونی تەمەن، ئەو مادە سپیە دادەبەزێت؛ هەژارییش پرۆسەکە خێراتر دەکات.

 

لێکۆڵینەوەکە لەلایەن زانکۆی لۆزان و زانکۆی جنێڤی سویسراوە کراوە و پشتی بە پشکنینی 751 کەس بەستووە، کە تەمەنیان لەنێوان 50 تاوەکو 91 ساڵ بووە.

 

بەگوێرەی ئەنجامی لێکۆڵینەوەکە، لە پشكنینی مێشكدا دەرکەوتووە، ئەوانەی هەژارن، مادە سپییەکەی مێشكیان زووتر پیر دەبێت و لە تاقیکردنەوەی ژیریشدا نمرەی کەمتر لە دەوڵەمەندەکان بەدەستدەهێنن.

 

مادەی سپی بۆ گواستنەوەی پەیام و ئاماژەکان لەنێو مێشکدا گرنگە، رادەی بەردەستیی مادەکەش کاریگەریی لەسەر توانای بیرکردنەوە و ژیری هەیە.

 

لە زووەوە هەژاری بە هۆکارێکی تەندروستیی خراپ و پیربوونی خێرا دانراوە.