توێژینەوەیەک: گەشتکردن بۆ بۆشایی ئاسمان زیانی تەندروستیی دەبێت
رووداو - تەندروستی
توێژینەوەیەکی زانکۆی جۆن هۆپکینس لە ئەمریکا دەریدەخات، گەشتە درێژخایەنەکانی بۆشایی ئاسمان زیانی تەندروستیی دەبێت و ماسوولکەکانی دڵ لاواز دەکات.
توێژینەوەکە ئاماژە بەوەدەکات، مانەوە لە بۆشایی ئاسمان بۆ ماوەیەکی زۆر دەبێتە هۆی لاوازبوونی شانەکان و هەوکردن، هەروەها ئەگەری تووشبوون بە ناڕێکی لێدانی دڵ پێنج ئەوەندە زیاددەکات.
د. دێڤین مایێر، سەرپەرشتیاری توێژینەوەکە دەڵێت، ''ئەم نیشانانە بە مانەوە لە بۆشایی ئاسمان دروستدەبن، بە گەڕانەوەی کەسەکە بۆ سەر زەوی نیشانەکان نامینێن''.
بە گوێرەی زانکۆی جۆن هۆپکینس لە ئەمریکا، ئەم توێژینەوە بە ناردنی شانەکانی دڵ و بەشداری کردنی کەشتیوانان ئەنجامدراوە و لە ئێستادا توێژینەوە لەسەر چارەسەکردنی ئەم کێشە تەندروستییانە کە لە بۆشایی ئاسمان دروستدەبن ئەنجامدەدرێت.