پسپۆڕێکی خۆراک: سووپ و زەڵاتە لە دەستپێکی شکاندنی رۆژوودا بخورێن

 

د. هۆلیم هاشم، پسپۆڕی خۆراک بە رووداوی راگەیاند، مانگی رەمەزان دەکرێت ببێتە هەلێک بۆ پەیڕەوکردنی رێژیمێکی تەندروست بۆ دابەزاندنی کێش و بایەخدان بە تەندروستی.

 

هاوکات دەڵێت: لە سەرەتای رۆژووشکاندن پێویستە خۆراکەکان بە باشی بجووێن و سەرەتاش شلەمەنییەک بخورێتەوە، هاوکات دەشڵێت: بەهیچ شێوەیەک لە ژەمی ئێوارەدا شیرینییەکان نەخورێن.

 

ئەو پسپۆڕەی خۆراک ئاماژە بەوەشدەکات، سووپ و زەڵاتە لە سەرەتای دەستپێکی شکاندنی رۆژوودا بخورێن بەتایبەت ئەو زەڵاتەیەی کە دەوڵەمەند بێت بە 'تەماتە، کاهوو، برۆکلی، خەیار، قەرنابیت و زەیتی زەیتوون' هۆکارەکەش رووندەکاتەوە و دەڵێت: وا دەکەن کەسی رۆژووەوان کێشەی هەرسی بۆ دروستنەبێت و جەستەی خۆراکە مادەی پێویستی دەست بکەوێت.

 

بە گوتەی د. هۆلیم، لەنێوان ژەمی بەربانگ تاوەکو پارشێو دەتواندرێت 8-12 پەرداخ ئاو بخورێتەوە تاوەکو جەستە بە شێداری بهێڵدرێتەوە.

 

بەشێکی رۆژووەوانان لە سەرەتاکانی مانگی رەمەزاندا دووچاری چەند کێشە و ناڕێکییەکی تەندروستیی دەبنەوە وەکو 'قەبزی، دڵەکزێ، سەرئێشە و دروستبوونی گازەکانی گەدە'، لەم بارەیەوە ئەو پسپۆڕەی خۆراک گوتی، ئەو کەسانە پێویستە لە سەرەتای رۆژووشکاندنیان زەڵاتە و شلەمەنی بخۆن و لە خۆراکە 'سوێر، ترش و خێراکان' دووربکەونەوە.

 

 

ئەو پسپۆڕە دەڵێت: نەخێر، چونکە زۆرخۆری لە پارشێودا مانای برسینەبوون نییە لەکاتی بەڕۆژووبووندا و ئەوەش بە هەڵە دادەنێت کە ئەو خۆراکەی لە ژەمی ئێوارەدا خوراوە، لە پارشێویشدا دووبارە بخورێتەوە.

 

د. هۆلیم رونی دەکاتەوە، زۆرخۆری هەستی برسیبوون زیاددەکات و پێویستە بایەخی زیاتر بە خۆراکە پڕۆتینییەکان بدرێت، تاوەکو هەستی برسیبوون کەمببێتەوە.

 

 

پسپۆڕەکە گوتی، ''قەبزی سەرەکیترین کێشەی ئەوانەیە کە لەو مانگەدا بەڕۆژوو دەبن و پێویستە زۆرخۆری نەکەن، بەجۆرێک کە پێش ئەوەی تێربن دەست لە خواردن هەڵبگرن، هەروەها بڕێکی دیاریکراویش ئاو بخۆنەوە''.

 

پاشانیش دەڵێت: ''پاڵکەوتن دوای ژەمی خۆراک بۆ تووشبووانی نەخۆشیی کۆڵۆن قەدەخەیە و باشترە هەمیشە بە چالاکیی بمێننەوە و لە خۆراکە سوورەوەکراوەکان و شیرینییەکانیش دووربکەونەوە''.

 

 

د. هۆلیم هاشم لەم بارەیەوە دەڵێت: 'خواردنی ترشیات، خواردنی بڕێکی زۆر لە ئاوی تەماتە، زۆرخۆری لە خۆراکە چەور و سوورەوەکراوەکان و خواردنی خۆراک بە خێرایی' هۆکارن بۆ دڵەکزێ.

 

ئەو پسپۆڕە گوتی، زۆرخواردنەوەی چا و قاوە دەشێت هۆکاربێت بۆ دڵەکزێ و باشترە بایەخ بە چای سەوز بدرێت.