وەزارەتی تەندروستی: هەڵمەتی کوتان دژی نەخۆشی سورێژە دەستپێدەکات

 

رۆژی سێشەممە، 16-04-2024، وەزارەتی تەندروستی رایگەیاند، هەڵمەتەکە لە چوارچێوەی گرتنەبەری رێوشوێنەكانی پاراستنی تەندروستیی هاووڵاتییان و نەوەکانی ئایندەیە.

 

هەڵمەتەکە گشتگیر و فراوانە و سەرتاسەری هەرێمی كوردستان دەگرێتەوە. وەزارەتی تەندروستی دەڵێت، لەنێو باخچەكانی ساوایان و قوتابخانە سەرەتاییەكانەوە لەرێگەی سێ هەزار و 280 کارمەندەوە دەستپێدەکات و نزیکەی 873 هەزار و 191 منداڵ دەگرێتەوە. 

 

بڕیارە هەڵمەتی کوتان دژی نەخۆشی سورێژە منداڵانی باخچەی ساوایان و قۆناخی یەكەم تاوەكو قۆناخی شەشەمی سەرەتایی بگرێتەوە.

 

هەڵمەتە ماوەی 10 رۆژ دەخایەنێت. وەزارەتی تەندروستی دەڵێت، 10 هەزار و 916 سەردانیان بۆ سێ هەزار و 981 قوتابخانە دەبێت، لە رێگەی هەزار و 94 تیمەوە. 

 

هەڵمەتەکە بە هاوئاهەنگی لەنێوان وەزارەتی تەندروستیی هەرێمی کوردستان و عێراق و رێكخراوەکانی تەندروستیی جیهانی"WHO " و یونسێف دەبێت.

 

سورێژە نەخۆشییەکی ڤایرۆسیی گوازراوەیە و زیاتر تووشی منداڵان دەبێت، بەتایبەت منداڵی تەمەن 2 بۆ 5 ساڵ. 

 

هەروەها بە خێرایی تەشەنە دەکات و کۆکین، پژمین و بەرکەوتنی راستەوخۆ لەگەڵ کەسی تووشبوو رێگەی گواستنەوەی نەخۆشییەکەن.

 

نیشانەکانی نەخۆشییەکە بریتین لە 'تا، کۆکە، بێهێزی، هەناسەتەنگی، سووربوونەوەی چاو و دەرکەوتنی پەڵەی سوور لەسەر جەستە' هەروەها حەوت بۆ 10 رۆژ دوای بەرکەوتن بە ڤایرۆسەکە دەشێت نیشانەکان دەربکەون.

 

ئەوانەی کە تووشی سوورێژە دەبن، پێویستە پشوو بدەن، ئاو و شلەمەنی زۆر بخۆنەوە و جیابکرێنەوە، هەروەها هەریەک لە دەرمانەکانی کەمکردنەوەی تا، دژەخوران و تەواوکەرە خۆراکییەکان لە ژێر راوێژی پزیشکدا بەکاربێنن.