بەشی تەندروستیی گشتیی کەرکووک: سەگی بێلانە لە شارەکە زۆربووە و پێویستە کۆبکرێنەوە

 

ئەمڕۆ چوارشەممە 13-11-2024 سەباح نامیق، سەرۆکی بەشی تەندروستیی گشتی لە تەندروستیی کەرکووک بە رووداوی گوت، ڤاکسینی دژی هاریی سەگ بەردەستە، بەڵام رێژەکەی کەمە و زۆر کەس دەستی ناکەوێت.

 

سەباح نامیق روونی دەکاتەوە، ئەو ڤاکسینە لە نەخۆشخانەی ئازادی، کۆماری و داقووق و حەویجە بەردەستە.

 

لە کۆتاییدا گوتیشی، هەر کەسێک سەگ گەستی، پێویستە بە زووترین کات بهێندرێتە ئەو نەخۆشخانانە تاوەکو ڤاکسینەکەی لێبدرێت و زوو چارەسەر بکرێت.

 

هەر ئەمڕۆ قسە لەگەڵ سامان یابە، گوتەبێژی تەندروستیی کەرکووک کرا و گوتی کە پەیوەندییان بە چارەسەری کێشەکەوە نییە و دەبێت بەڕێوەبەرایەتیی ڤێتێرنەری و شارەوانیی کەرکووک چارەسەری بکەن.

 

لە کەرکووک حاڵەتەکانی گەستنی سەگ زیادبوون، بە گوتەی قایمقامی کەرکووک، شێڵتەرێک لەسەر رووبەری پێنج دۆنم بۆ سەگی بێلانە دروستکراوە و زیاتر لە 500 سەگی تێدا کۆکراوەتەوە، بەڵام هێشتا ژمارەی سەگە بێلانەکان زۆرن.

 

منداڵێک بەهۆی گەستنی سەگەوە لە شاری کەرکووک گیانی لەدەستدا.