پسپۆڕێکی نەشتەرگەرییەکانی دڵ: جگە لە سۆنەر پشکنینی ئیکۆی دڵ بۆ کۆرپەلە بکرێت

 

دکتۆر ئارام بەختیار هەڵشۆیی، پسپۆڕی نەشتەرگەرییەکانی دڵ لە بوولتەنی هەواڵەکاندا بە تۆری میدیایی رووداوی راگەیاند، گرنگە لەماوەی دووگیانی و دوای لەدایکبوونی کۆرپە، پشکنینی پێشوەختە بۆ تەندروستیی دڵی منداڵ بکرێت و لە ئەگەری هەبوونی هەر کێشەیەک بەزووترین کات پەنا ببرێتە بەر چارەسەر. 

 

لەبارەی ئەو پشکنینانەی بۆ تەندروستیی کۆرپەلە گرنگە دکتۆر ئارام دەڵێت: ''دوای هەفتەی 18ـی دووگیانی پێویستە گرنگی زیاتر بە لایەنی تەندروستیی دڵی کۆرپە بدرێت و پشکنینی سۆنەر بە وردی لەلایەن پزیشکەوە خوێندنەوەیەی بۆ بکرێت''، هەروەها دەشڵێت: بۆ دڵنیابوونەوەی تەندروستیی دڵی کۆرپەلە دەتواندرێت جگە لە سۆنەر پەنا ببرێتە بەر پشکنینێکی وردتر بەناوی 'ئیکۆی کۆرپەلە' کە لێدان و پێکهاتەکانی دڵ هەڵدەسەنگێنێت.

 

بەگوتەی پسپۆڕەکە، لەکاتی بوونی نیشانەکانی وەکو 'گریانی بەردەوام، جێگربوونی کێشی کۆرپە، لاوازیی بەرگریی جەستە و شینبوونەوە لەکاتی گریان' پشکنینی ئیکۆی دڵ بۆ کۆرپە گرنگە.

 

دکتۆر ئارام بەئومێدەوە باسی چارەسەرکردنی نەخۆشییە سکماکییەکانی لە هەرێمی کوردستان کرد و گوتی: بەخۆشحاڵییەوە بەشێکی زۆر لە کێشە سکماکییەکان دەتواندرێن لە هەرێمی کوردستان چارەسەربکرێن و بۆ ئەم مەبەستەش تیمی پسپۆڕ هەیە، بەجۆرێک زیاتر لە 60٪ بۆ 70٪ـی نەخۆشییە سکماکییەکان و بەتایبەت نەخۆشییەکانی دڵ توانای چارەسەرکردنیان هەیە.