بەڕێوەبەری نەخۆشخانەی منداڵان لە سلێمانی: تووشبوون بە کۆرۆنا لەنێو منداڵان زیادیکردووە

 

رۆژی چوارشەممە، 6-7-2022، د. پشدەر عەبدوڵڵا، بەڕێوەبەری نەخۆشخانەی جەمال ئەحمەد رەشیدی منداڵان لە پارێزگای سلێمانی بە رووداوی گوت: "پەتایەک لەنێو منداڵان بڵاوبووەتەوە کە بە تای بەرز و قوڕگ ئێشە و سەرئێشە و بەشێكیان لووت تەڕی دەناسرێنەوە. بەشێکی زۆری ئەو نیشانانەش تووشبوونە بە ڤایرۆسی کۆرۆنا."

 

بە گوتەی د. پشدەر عەبدوڵڵا: "ئێستا هیچ ماڵێک نییە لە هەرێمی کوردستان منداڵێکی تووشی ئەو پەتایە نەبووبێت. رۆژانە 80 بۆ 90 تووشبووی لەو جۆرانە سەردانی نەخۆشخانەکەمان دەکەن." گوتیشی: "ئێمە هەر لە کاتی پەتای سکچوون و رشانەوە رامانگەیاندبوو، کە گومان دەکەین بەشێکی زۆری ئەو تووشبووانە ڤایرۆسی کۆرۆنا بن."

 

بەڕێوەبەری نەخۆشخانەی دکتۆر جەمال ئەحمەد رەشیدی منداڵان هۆشداری بە هاونیشتمانییان دەدات و دەڵێت: "نەترسن و دەرمانی زۆر بەکارنەهێنن، ئەگەر ئەو نیشانانە دەرکەوت بزانن کە کۆرۆنایە. لە کاتی دەرکەوتنی نیشانەکان لە منداڵەکانتان سەردانی نەخۆشخانە بکەن و با پسپۆڕی منداڵان بیانبینن." 

 

رۆژی سێسشەممە، 5-7-2022، د. بێریڤان عەدنان، بەڕێوەبەری بەڕێوەبەرایەتیی خۆپاراستنی تەندروستیی هەولێر لەبارەی بەرزبوونەوەی تووشبوون بە ڤایرۆسی کۆرۆنا بە رووداوی راگەیاند: "ئێستا لە شەپۆلی پێنجەمی بڵاوبوونەوەی ڤایرۆسی کۆرۆناداین، راستە لەم شەپۆلەدا رێژەی گیانلەدەستدان کەمترە بەراورد بە جۆر و شەپۆلەکانی پێشتر، بەڵام ژمارەی تووشبوون زۆرتر و بڵاوبوونەوەی ڤایرۆسەکە خێراترە."

 

بەڕێوەبەری بەڕێوەبەرایەتیی خۆپاراستنی تەندروستیی هەولێر گوتیشی: "دوورکەوتنەوەی خەڵک لە رێنوێنییەکانی تایبەت بە خۆپاراستن و دەستکردن بە تێکەڵبوون و پابەندنەبوون بە مەودای دووری، هۆکاری سەرەکین بۆ بڵاوبوونەوەی زیاتری ڤایرۆسەکە، دەبێت خەڵک زیاتر پابەندی رێنوێنییەکان بێت، چونکە ئێستا ئەوانەشی کە ڤاکسینیان کردووە، ئەگەری تووشبوونیان بە ڤایرۆسەکە زیادیکردووە و دەیگرنەوە، بۆیە بەتایبەت لە رۆژانی داهاتوو و جەژنی قوربان بە نیازی دەرکردنی کۆمەڵێک رێنوێنیی نوێین تایبەت بە خۆپاراستن."

 

د. بێریڤان عەدنان ئاماژەی بۆ ئەوەش کرد، کەمیی ڤاکسینکردن یەکێکی دیکەیە لە هۆکارەکانی زیادبوونی ژمارەی تووشبووان و بە قسەی ئەو "دەبوو لە کۆتایی ساڵی 2021دا رێژەی 60%ـی خەڵک ڤاکسینیان وەرگرتبایە، بەڵام تاوەکو ئێستا رێژەکە لە دەوروبەری 50% دەبێت."

 

ئێستا لە هەرێمی کوردستان سێ ڤایرۆس هەڕەشەی زۆریان لەسەر خەڵک دروستکردووە، ئەوانیش کۆرۆنا، تای خوێنبەربوون و کۆلێران، بەرپرسانی وەزارەتی تەندروستی زوو زوو باس لە پێویستیی پابەندبوونی خەڵک بە رێنوێنییەکان بۆ خۆدوورگرتن لە کێشەی ڤایرۆسەکان دەکەن.