پسپۆڕێکی نەخۆشخانەی هیوا بۆ تووشبووانی شێرپەنجە: لەمەودوا قژتان هەڵناوەرێت
رووداو - تەندروستی
پسپۆڕێکی نەخۆشخانەی هیوا رایدەگەیێنێت، ئەمڕۆ ئەو ئامێرەی رێگری لە قژهەڵوەرین دەکات بە چارەسەری کیمیایی، بۆ تووشبوویەکی شێرپەنجە بەکارهات.
ئەمڕۆ پێنجشەممە 5-12-2024 د. شاڵاو حەمەعەلی، پسپۆڕی نەخۆشییەکانی شێرپەنجە لە نەخۆشخانەکە رایگەیاند، ئامێرەکە بۆ چەند دەرمانێکی کیمیایی بەکاردێت کە کاریگەریی لاوەکییان زۆرە و دەبنەهۆی هەڵوەرینی قژ و مووی روخسار، بەڵام زۆرجار بۆ ئەو نەخۆشانە بەکاردێت کە شێرپەنجەی مەمکیان هەیە.
بە گوتەی ئەو پسپۆڕە، ئامێرەکە لەلایەن کۆمپانیایەک و رێکخراوێکەوە دابینکراوە و لە ماوەکانی داهاتووشدا 10 ئامێری دیکەیان بۆ دابیندەکرێت.
ئامێرەکە پێی دەڵێن ئامێری cooling cap کە وەکو کڵاوێکە و هەر تووشبوویەک لەکاتی چارەسەری کیمیاییدا دەیکاتە سەری، ئەمەش وادەکات ئەو نەخۆشانە کەمتر قژ و مووەکانی روخساریان هەڵبوەرێت.