WHO: چەندین هۆکاری نەخۆشیی هەن کە دەبێت ڤاکسینی نوێیان بۆ بەرهەمبهێندرێت
رووداو - تەندروستی
رێکخراوی تەندروستیی جیهانی WHO رایدەگەیێنێت، 17 هۆکاری نەخۆشیی هەن کە دەبێت بەپەلە ڤاکسینی نوێیان بۆ دابینبکرێت.
رێکخراوەکە ئاماژە بەوەدەکات، هەر یەکە لە ڤایرۆسی ئایدز، مەلاریا، هەوکردنی جگەر و چەند جۆرێکی بەکتریا و کەڕووی هۆکاری نەخۆشی هەن کە بەردەوام لە ریزبەندی سەرەکی مەترسییە گەورەکانن بۆ تەندروستیی گشتی.
ماتێوس هاسۆ. بەڕێوەبەری توێژینەوەکان و بەرهەمەکانی ڤاکسین لە WHO دەڵێت، ''دەستنیشانکردنی باوترین هۆکارەکانی نەخۆشیی و دابینکردنی ڤاکسینی نوێ بۆ پێشگیریکردن لە بڵاوبوونەوەی نەخۆشییەکان رێگەیەکی کاریگەرە بۆ باشترکردنی تەندروستی ناوچەیی و جیهانی''.
بە گوێرەی رێکخراوی تەندروستیی جیهانی و دەزگای نەتەوە یەکگرتووەکان، پشتگیری لە گەیشتن بە ئامانجی کارنامەی 'کوتان 2030' دەکرێت بۆ ئەوەی دڵنیاببنەوە لەوەی هەموو کەسێک لە هەر ناوچەیەک سوود لە ڤاکسینە جیاوازەکان وەردەگرن و لە نەخۆشییە مەترسیدارەکان دەپارێزرێن.