توێژینەوەیەکی بەریتانی: میوزیک نیشانەکانی ئیفلیجی کەمدەکاتەوە

 

زانکۆی ئەنگڵیا روسکین لە بەریتانیا دەریدەخات، چارەسەری دەماری بە میوزیک یارمەتیدەرە لە باشترکردنەوەی خانەکانی مێشک بەتایبەت لە تووشبووانی نەخۆشیی لەرزین 'پارکینسۆن'، فرەڕەقبوونی دەماری MS و جەڵتەی مێشک. 

 

توێژینەوەکە بە هاوکاری پەیمانگەی کامبریچ بۆ چارەسەریی میوزیکی بە بەشداری چەند منداڵێک کرا، کە پێکانی مێشکیان هەبوو و دەرکەوت، نیشانەکانی ئیفلیجییان لەدوای چارەسەر بە میوزیکەوە کەمتربووە، بەجۆرێک جووڵە و هەڵسوکەوتیان بەرەو باشبوونەوە دەڕۆیشت.

 

بو گوتەی گێما کیڵی، چارەسەرکاری سرووشتی و یەکێک لە سەرپەرشتیارانی توێژینەوەکە، میوزیکەکە بەجۆرێکە کە ئاوازەکەی لەگەڵ جووڵەی چارەخوازەکەدا دەگۆڕێت، بەتایبەت جووڵەی هەنگاوەکان، بەمەش کاریگەریی زیاتر لەسەر باشتربوونی بەپێ رۆیشتن دروستدەکات.

 

میشێل تاوت، چارەسەرکاری میوزیکی لە کەنەدا دەڵێت: ''جووڵە سەرەکیترین وەڵامدانەوەی جەستەیە بۆ میوزیک، بۆیە میوزیک لە باشترکردنی جووڵەی کەسانی پەککەوتوو و ئیفلیج کاریگەریی ئەرێنی دەبێت و خێرایی میوزیکەکە هاوتا دەبێت لەگەڵ جووڵەی چارەخوازەکە.''

 

میشێل تاوت گوتیشی، لەگەڵ چارەسەری سرووشتی باشترە بایەخ بە چارەسەری هاندانی میوزیکیش بدرێت، لەپێناو ئەوەی بەزووترین کات تواناکانی مێشک بەرەو باشی بڕۆن. 

 

دامەزراوەی پێکانەکانی مێشک لە ئەمریکا رایدەگەیێنێت، چارەسەری هاندانی میوزیکی بۆ ئەو کەسانە بەسوودە کە کێشەی ناڕێکیی جووڵە و هاوسەنگبوونی جەستەیان هەیە، چونکە هانی مێشک دەدات بەگوێرەی ئاوازی میوزیکەکە جووڵە بە جەستە بکات.

 

هەروەها دامەزراوەکە ئاشکرای دەکات، بەرکەوتنی زەبر بە مێشک لە منداڵ و کەسانی گەنج بەربڵاوە کە هەندێکجار تووشی ئیفلیجبوون و ناڕێکیی بیرکردنەوەیان دەکات.