نەخۆشخانەی دەروونیی هەولێر: خەمۆکی و دڵەڕاوکێ پێشەنگی کێشە دەروونییەکانی گەورانن

 

ئەمڕۆ چوارشەممە 2ـی تشرینی یەکەمی 2024 د. رێدار محەممەد، جێگری بەڕێوەبەری نەخۆشخانەی دەروونیی هەولێر بە رووداوی راگەیاند، 32٪ـی ئەوانەی لە راوێژکاریی گەوران تۆمارکراون کێشەی خەمۆکی و دڵەڕاوکێیان هەبووە.

 

د. رێدار محەممەد، جێگری بەڕێوەبەری نەخۆشخانەی دەروونیی هەولێر و پسپۆڕی نەخۆشییە دەروونییەکان دەڵێت: لەنێو منداڵان گرفتە رەفتارییەکان وەکو 'کەللەڕەقی، تێکەڵاونەبوون، دووبارەکردنەوەی رەفتارەکان، گریانی بەردەوام و سووربوون لەسەر ئەو شتەی منداڵەکە دەیەوێت' کێشە هەرە باوەکانی نێو منداڵانن.

 

لەبارەی رێژەی خەمۆکی و دڵەڕاوکێ لەنێو گەوران ئەو پسپۆڕە بە شێوەیەکی گشتی باسی دۆخەکانی کرد و گوتی، هۆکاری سەرەکیی ئەو دوو کێشە دەروونییە دیاریکراو نین و زۆر هۆکار هەن بۆ ئەوە.

 

لە بەشێکی قسەکانیدا هۆشداری دەداتە هاونیشتمانییان لەوەی کە بۆ چارەسەری کێشە و گرفتە دەروونییەکانیان نەچنە لای کەسانی ناشارەزا، تەنانەت بە پێویستیشی دەزانێت کە ''مامۆستایانی ئایینی رۆڵی پاڵپشتیکار بۆ پسپۆڕانی دەروونی ببینن لە چارەسەکردنی کێشە دەروونییەکانی تاک''.

 

 

- نەبوونی شەرم لە نەخۆشییە دەروونییەکان.

- نەچوونە لای کەسانی ناشارەزا و هەڵە بۆ چارەسەری نەخۆشی و ناڕێکییە دەروونییەکان؛ چونکە تەنیا پسپۆڕی دەروونی دەتوانێت دەرمان بدات بە نەخۆش.

- بەکارهێنانی دەرمانە دەروونییەکان بەشێوەیەکی گونجاو و بەگوێکردنی رێنوێنییەکانی پزیشک.

ئامارەکان

 

لەکۆی شەش مانگی ئەمساڵدا لەو نەخۆشخانەیە، حەوت هەزار و 656 کەس لە راوێژکاری گەوران بینراون و 996 منداڵیش لە راوێژکاری بینراون، ئەمە لەکاتێکدایە کە بەراورد بە شەش مانگی ساڵی رابردوو پێنج هەزار و 838 کەس لە راوژکاریی گەوران و هەزار و 495 لە راوێژکاریی منداڵان بینراون.

 

بەپێی ئەو ئامارانەی دەست تۆڕی میدیایی رووداو کەوتوون، تەنیا لە نەخۆشخانەکە لە نۆ مانگی ئەمساڵدا، رێژەی تووشبووانی خەمۆکی 32٪ لەنێو گەوران و 6٪ لەنێو منداڵان تۆمارکراوە.