بانە شێروان گۆرانییەکی نوێ بڵاودەکاتەوە
رووداو - ئیستەنبووڵ
دوای ئەو ناوبانگەی لە گۆرانی "بڕۆ" بەدەستیهێنا، بانە شێروان، کچە گۆرانیبێژ و هونەرمەندی کورد سەرقاڵی ئامادەکاری بۆ بەرهەمهێنانی ڤیدیۆکلیپێکی نوێیە و دەڵێت "بەمنزیکانە" بڵاودەبێتەوە.
بانە بۆ بەرهەمهێنانی کلیپی گۆرانییەکە چووەتە ئیستەنبووڵ، دەڵێت: یەکەم گۆرانییە کە خۆی بەتەنیا دەیڵێت و بەرهەمی دەهێنێت.
گۆرانییە نوێیەکەی بانە ناوی "بۆچی" ـیە، بە گوتەی بانە، کاری دابەشکردنی میوزیکی گۆرانییەکە لەلایەن ئەفشین شوکری کراوە و میوزیکەکانیشی لە ستۆدیۆکانی ئێران و تورکیا دروستکراون.
لەبارەی داهاتووی کارەکانی بانە بە رووداوی راگەیاند "خەیاڵم زۆر فراوانە، هیوادارم تاوەکو تەمەنم گەورەتر دەبێت چەندین کاری جوان بۆ کوردستان بکەم و بە گەنجەکانیش بڵێم دەتوانن بگەن بەو ئاستەی خۆتان دەیانەوێت".