بەرپرسی وەشانخانەی خانی: دەبێت نووسەرانی نوێ، بەرهەمی نووسەر و شاعیرانی کلاسیک بخوێننەوە

 

16ـەیەمین پێشانگەی نێودەوڵەتیی کتێبی هەولێر کۆتایی هات. ئەمساڵ چوار وەشانخانە لە رۆژهەڵاتی کوردستانەوە بە سەدان ناونیشانی جیاوازی کتێبەوە بەشداربوون و لە لایەن خوێنەرانی کتێبەوە پێشوازییان لێکرا. یەک لەوانە وەشانخانەی خانی بوو کە لە چەند ساڵی رابردوودا، لە بواری ئەدەبی و فەلسەفیدا، دەیان ناونیشانی جیاوازی کتێبی چاپ و بڵاوکردووەتەوە. 

 

16ـەیەمین پێشانگەی نێودەوڵەتیی کتێب لە 17ی ئەم مانگە دەستیپێکرد و 10 رۆژ بەردەوام بوو.

 

ئازاد حەسەنی بەرپرسی وەشانخانەی خانی بە رووداوی گوت؛ ئەم پێشانگەیە دەرفەتێکی زۆرباشە کە چەند ساڵێکە وەشانخانەکانی رۆژهەڵاتی کوردستانیش تێیدا بەشدارن و دەبێتە هۆی دروستکردنی پردێک لەنێوان نووسەران و خوێنەراندا. 

 

ئازاد حەسەنی سەبارەت بە دۆخی زمان و ئەدەبی ئەمڕۆی کورد گوتی: "پێویستە بەرەی نوێی نووسەران و وەرگێڕان، بۆ ئەوەی زمانی ئەدەبییان پتەو بێت و بتوانن بە بەرهەمەکانیان بە باشی لەگەڵ خەڵکدا پەیوەندی دروست بکەن، کتێبی نووسەران و شاعیرانی کلاسیکی بخوێننەوە". 

 

بەبڕوای حەسەنی ئەمڕۆ زۆربەی ئەو نووسەر و وەرگێڕانەی کتێبەکانیان چاپ و بڵاو دەکەنەوە، بە باشی شارەزای ئەدەبی کلاسیکی کوردین، "ئەوەش وایکردووە وەرگێرانەکانیان جێگەی متمانە بێت.

 

لە بەشێکی هەڤپەیڤینەکەدا، ئازاد حەسەنی باس لە کێشەکانی وەشانخانەکان لە رۆژهەڵاتی کوردستان و ئێران دەکات و دەڵێت: "ناکرێ دۆخی چاپ و بڵاوکردنەوەی کتێب لەگەڵ دۆخی ژیانی رۆژانەی خەڵک جیا بکرێتەوە و ئەو دوو بوارە بە تەواوی پەیوەندییان بە یەکەوە هەیە."

 

بە گوتەی ئازاد حەسەنی بەربەستەکانی بەردەم چاپ و بڵاوکردنەوەی کتێب زۆرن، بەڵام وەشانخانەکان بەردەوام رێگەی نوێیان دۆزیوەتەوە بۆ زاڵبوون بەسەر ئەو کێشانەدا و بەردەوامبوون لە کارەکانیاندا.