دوای زیاتر لە 18 مانگ بۆ یەکەمجار نرخی بیتکۆین 31 هەزار دۆلاری تێپەڕاند

 

 

ئەمڕۆ سێشەممە 27-06-2023، نرخی هەر بیتکۆینێک 795 دۆلار بەرزبووەوە و گەیشتە 31 هەزار و 16 دۆلار، ئەوەش بەرزترین ئاستە لەدوای مانگی تشرینی دووەمی ساڵی 2021ەوە.

 

هەرچەندە نرخی بیتکۆین دواتر بۆ 30 هەزار و 800 دۆلار دابەزی، بەڵام بەربەستی 30 هەزار و 700 دۆلاری شکاند، کە ماوەیەکی زۆرە لە خوار ئەو ئاستەوەیە.

 

هاوکات نرخی ئیسێریومیش کە دووەم گەورەترین دراوی دیجیتاڵیی جیهانە لەدوای بیتکۆین، نزیکەی 35 دۆلار بەرزبووەوە و هەر ئیسێریۆمێک بە هەزار و 887 دۆلار مامەڵەی پێوەدەکرێت.

 

بەرزبوونەوەی نرخی بیتکۆین لە 15ی ئەم مانگەوە دەستیپێکرد، کاتێک بلۆک رۆک، گەورە کۆمپانیای ئەمریکی بواری وەبەرهێنان بە فەرمی داواکاریی پێشکێشی کۆمیسیۆنی ئاڵوگۆڕی ئەمریکا کرد تاوەکو خۆی لە مامەڵەکانی بیتکۆین تۆمار بکات.

 

ئەوکاتە نرخی بیتکۆین نزیکەی 25 هەزار و 300 دۆلار بوو؛ بەم پێیە، لەوکاتەوە نرخی هەر بیتکۆینێک نزیکەی شەش هەزار دۆلار بەرزبووەتەوە.

 

تەنیا ئەمڕۆش نرخی یەک بیتکۆین نزیکەی هەزار و 300 دۆلار بەرزبووەتەوە هەر بیتکۆینێک بە 29 هەزار و 500 دۆلار مامەڵەی پێوەدەکرێت.

 

دوای کۆمپانیای بلۆک رۆک، دوو گەورە کۆمپانیای دیکە؛ "ویزدەم تری" و "ئینڤێسکۆ"ـش هەمان داواکارییان پێشکێش بە کۆمیسیۆنەکە کرد. لەدوای ئەوکاتەوە، نرخی بیتکۆین بەردەوام بەرزبووەتەوە.

 

ئەمەش لە کاتێکدایە هەفتەی رابردوو وەبەرهێنان لە سەرمایە دیجیتاڵییەکان 199 ملیۆن دۆلار زیادبوون، ئەوەش بەرزترین ئاستی زیادبوونی هەفتانەیە لەدوای تەمموزی ساڵی 2022ـەوە کە 94٪ـی ئەو بڕە بۆ بیتکۆین بووە کە دەکاتە 187 ملیۆن دۆلار.

 

هاوکات رۆژی 5ـی ئەم مانگە، نرخی بیتکۆین زیاتر لە 1800 دۆلار دابەزی. ئەوەش دوای ئەوەی کۆمیسیۆنی ئاڵوگۆڕی ئەمریکا گەورترین سەکۆی دراوە دیجیتاڵییەکانی لە جیهاندا بە پێشێلکردنی یاسا ئەمنییەکان تۆمەتبار کرد.

 

ئەوکاتە، نرخی هەر بیتکۆینێک نزیکەی 6%، یان 1660 دۆلار دابەزی و هەر بیتکۆینێک بە 25 هەزار و 600 دۆلار مامەڵەی پێوەکرا. ئەمەش نزمترین ئاستی نرخی بیتکۆین بوو لە دوای مانگی ئاداری ئەمساڵ.