محەممەد شیاع سوودانی: رێککەوتنێکی هاوبەشیی ستراتیژیمان لەگەڵ ماکرۆن واژۆکرد

 

کاژێر نزیک بە 11ـی شەوی پێنجشەممە، 26-1-2023، محەممەد شیاع سوودانی، سەرۆکوەزیرانی عێراق لە تویتێکدا لەسەرووبەندی سەردانەکەی بۆ فەرەنسا رایگەیاند، "کەمێک لەمەوبەر من و ماکرۆنی هاوڕێ، رێککەوتنی هاوبەشی ستراتیژییمان واژۆکرد کە نەخشەڕێگەیەک بۆ فراوانکردنی ئاسۆی هاوئاهەنگی لەنێوان هەردوو وڵات لەسەرجەم بوارەکان دادەنێت."

 

ئەمڕۆ پێنجشەممە؛ محەممەد شیاع سوودانی لەلایەن وەزیری بەرگریی فەرەنساوە پێشوازی لێکرا، سەردانەکەی سوودانی چەندین رێککەوتن لە رووی سەربازی و سەرچاوە سرووشتییەکان لەخۆدەگرێت و لە ئەجێندای سەردانەکەیدا هاتووە: سوودانی دەیەوێت کۆمپانیای تۆتاڵ ئینێرجی بێتە عێراق و گێڵگەی نەوت بدۆزێتەوە.

 

نووسینگەى رۆژنامەڤانیى سەرۆکوەزیرانى عێراق ئەجێنداى سەردانەکەى محەممەد شیاع سوودانى بۆ فەرەنسا بڵاوکردەوە و دەڵێت، جگە لە کۆبوونەوە لەگەڵ سەرۆکى ئەو وڵاتە، سوودانی لەگەڵ نوێنەرى کۆمپانیاکانى فەرەنسا کۆدەبێتەوە و چەند رێککەوتن و یاداشتێکى لێکتێگەیشتنیش لە بوارى وەبەرهێنان، وزە و گەڕاندنەوەى پارە براوەکانى عێراق واژۆ دەکەن. 

 

سەرۆکوەزیرانی عێراق لە تویتەکەیدا کە ناوەڕۆکی رێککەوتننەکەی ئاشکرانەکردووە، هەروەها دەڵێت، "لەگەڵ دۆستەکانمان بەردەوام دەبین لە کارکردن لەپێناو هاوبەشیی جیدی کە گەرەنتیی بەدیهێنانی چاکسازیی ئابووری و گەشەپێدانی بەردەوام بۆ عێراق بکات، هەروەکو لە کارنامەی حکومی وێنامان کێشاوە و پلانمان بۆ داناوە."