نرخی بەرمیلێک نەوت 83 دۆلاری تێپەڕاند

 

رۆژی سێشەممە، 25-07-2023، نرخی نەوتی برێنت 71 سەنت بەرزبووەوە و ئێستا هەر بەرمیلێک بە 83.44 دۆلار مامەڵەی پێوەدەکرێت؛ نرخی نەوتی سووکی تێکساسیش 81 سەنت بەرزبووەوە و ئێستا هەر بەرمیلێک بە 79.55 دۆلار مامەڵەی پێوەدەکرێت.

 

کەمیی خستنەڕوو بەراورد بە خواست و بەڵێنی بەرپرسانی چین بۆ پشتیوانیکردنی ئابووریی وڵاتەکە، هۆکاری سەرەکیی بەرزبوونەوەی نرخی نەوتن.

 

لە چوار هەفتەی رابردوودا نرخی نەوت بە بەرزبوونەوە کۆتایی بە مامەڵەکانی هێناوە.

 

لە چین کە دووەم گەورەترین ئابووریی جیهان و گەورەترین هاوردەکاری نەوتە لە جیهاندا، بەرپرسان بەڵێنیان داوە سیاسەتی پشتیوانیی ئابووریی زیاتر بکەن بۆ بووژاندنەوەی ئەو وڵاتە دوای هەڵگرتنی رێکارەکانی دژی کۆرۆنا.

 

لەگەڵ ئەوەشدا، بەشێک لە داتا ئابوورییەکان بەرزبوونەوەی نەوتیان سنووردار کردووە؛ بەپێی رووپێوییەک، لە ناوچەی یۆرۆ، چالاکیی بازرگانی لە مانگی رابردوودا کەمبووەتەوە، ئەوەش کاریگەریی نەرێنیی لەسەر نرخی نەوت هەبووە.

 

بەرزبوونەوەی نرخی نەوت لەکاتێکدایە، بڕیارە ئەمڕۆ سێشەممە کۆبوونەوەی دوو رۆژەی لیژنەی بازاڕی کراوەی بانکی ناوەندیی ئەمریکا دەستپێبکات و کاژێر نۆی شەوی چوارشەممە بڕیاری خۆی لەبارەی سوودی بانکییەوە رابگەیێنێت کە زۆرینەی ئابووریناسان پێشبینی دەکەن رێژەکە 0.25٪ زیادبکات، ئەوەش کاریگەریی لەسەر خواستی نەوت دادەنێت.