یەک دۆلار 66 هەزار تمەنی تێپەڕاند؛ نزمترین ئاستیەتی لە 6 مانگی رابردوودا

 

 

لە بازاڕەکانی ئێران و رۆژهەڵاتی کوردستان، هەر دۆلارێک گەیشتە 66 هەزار و 250 تمەن. ئەوەش لە کاتێکدایە، دوێنێ دووشەممە هەر دۆلارێک بە 64 هەزار و 250 تمەن بوو.

 

ئێوارەی ئەمڕۆ سێشەممە 22ی تشرینی یەکەم رەوەز میرزا، ئاڵوگۆڕکاری دراو لە بازاڕی دۆلارەکەی سلێمانی بە رووداوی گوت، ئێستا 100 دۆلار بە شێوەی حەواڵە بەرامبەر 6 ملیۆن و 600 هەزار تمەنە؛ بە شێوەی کاشیش بەرامبەر 6 ملیۆن و 400 هەزار تمەنە.

 

بەڵام لە هەولێر بەهای تمەن هێندە دانەبەزیوە. کەیفی خۆشناو، گوتەبێژی بازاڕی دۆلارفرۆشانی هەولێر بە رووداوی گوت، 100 دۆلار بە شێوەی حەواڵە بەرامبەر 6 ملیۆن و 300 هەزار تمەنە؛ بە کاشیش بەرامبەر 6 ملیۆن و 100 هەزار تمەنە.

 

هەواڵەکانی تایبەت بە ئەگەری بەهێزی وەڵامدانەوەی هێرشە مووشەکییەکەی سەرەتای ئەم مانگەی ئێران لەلایەن ئیسرائیلەوە ترس و دوودڵیی لەنێو بازرگانانی دراو لە ئێران دروستکردووە؛ بەو هۆیەوە خواست بۆ کڕینی دۆلاری ئەمریکی لە بازاڕدا زیادبووە.

 

لەدوای هێرشە مووشەکی و درۆنییەکەی نێوەڕاستی نیسانی ئەم ساڵی ئێران بۆسەر ئیسرائیل، 100 دۆلار لە بازاڕەکانی هەرێمی کوردستان گەیشتە 7 ملیۆن تمەن؛ لە بازاڕەکانی ئێران و رۆژهەڵاتی کوردستانیش بەهای هەر دۆلارێک گەیشتە 70 هەزار تمەن.

 

شرۆڤەکارانی بازاڕی دراوی ئێران پێیانوایە شکاندنی ئاستی 65 هەزار تمەن دەبێتە هۆکار بۆ ئەوەی بەهای دۆلار ئاستی 70 هەزار تمەن تاقیبکاتەوە.