وەزارەتی ناوخۆی ئێران: لە سنووری کرماشان بازاڕچەی سنووریی نوێ لەگەڵ عێراق دەکرێنەوە

 

یەکشەممە، 21ـی کانوونی دووەمی 2024، موحسین کووشش تەبار، جێگری وەزیری ناوخۆی ئێران بۆ کاروباری هاوئاهەنگیی ئابووری، سەردانی پارێزگەی کرماشانی رۆژهەڵاتی کوردستانی کرد و لە کەموکوڕییەکانی دەروازەی سنووریی پەروێزخان و خوسرەوی و کارگە پێشەسازییەکانی ئەو پارێزگایەی کۆڵییەوە. 

 

 موحسین کووشش تەبار رایگەیاند، "لە چوارچێوەی گەشەپێدانی پەیوەندییە ئابووری و بازرگانییەکانی ئێران و عێراق، هەروەها بەمەبەستی باشترکردنی باری گوزەرانی خەڵکی ناوچە سنوورییەکان، لە سنووری پارێزگەی کرماشان و لەسەر سنووری نێوان عێراق و ئێران، بازاڕچەی سنووریی نوێ دەکرێنەوە."

 

بەگوتەی ئەو بەرپرسەی وەزارەتی نێوخۆی ئێران، "لەو شوێنانەی بڕیارە بازاڕچەی سنووریی نوێیان تێدا بکرێتەوە، بەمەبەستی تاکفرۆشیی کەلوپەلەکان ژمارەیەک کابین (کەرەڤانە) دادەنرێن، بۆ ئەوەی دانیشتووانی سنووری هەردوو وڵات بتوانن پێداویستییەکانی یەکدی دابین بکەن."

 

موحسین کووشش تەبار هەروەها رایگەیاند، "عێراق، بەشە عەرەبییەکەی و هەرێمی کوردستانیشی، لە بواری بازرگانی و سنووریدا بۆ ئێمە وەک وڵاتێکی دۆست و برایە و بەردەوام یەکێک لە گەورەترین هاوبەشە ئابوورییەکانمان بووە."

 

جێگری وەزیری ناوخۆی ئێران بۆ کاروباری هاوئاهەنگیی ئابووری دەشڵێت، پلانێکی دیکەیان بۆ بەرەوپێشبردنی پەیوەندییە ئابوورییەکانی نێوان ئێران و عێراق، "دروستکردنی ناوچەی پێشەسازیی هاوبەشە لەگەڵ ئەو وڵاتە"، کە ئێستا رێکارە یاساییەکانی جێبەجێ دەکرێت.

 

موحسین کووشش تەبار باسی رێکخستنەوەی دەروازە سنوورییەکانی پەروێزخان و خوسرەوی کرد و گوتی، "پلانێکی باش و گشتی بۆ ئەم مەبەستە ئامادە کراوە و لەو دوو دەروازە سنوورییەدا، ترانزێتی کەلوپەل و گواستنەوەی گەشتیاران لە یەکتر جیاکراونەتەوە."

 

پارێزگەی کرماشان، 371 کیلومەتر سنووری هاوبەشی لەگەڵ هەرێمی کوردستان و عێراقدا هەیە. پارێزگەکە، پێنج دەروازەی سنووری هەیە کە سێیان لەگەڵ هەرێمی کوردستانن، دەروازەیەک دەکەوێتە سەر سنووری خانەقینی باشووری کوردستان و دەروازەیەکی سنووریش لەگەڵ ناوچەکانی دیکەی عێراقە.

 

دەروازە سنوورییەکانی پەروێزخان، شووشمێ و شێخ سڵە دەکەونە سنووری هەرێمی کوردستان، دەروازەی سوومار دەکەوێتە سنووری قەزای خانەقین لە باشووری کوردستان و دەروازەی سنووری خوسرەویش دەکەوێتە سەر سنووری نێوان کرماشان و ناوچەکانی دیکەی عێراق.