عێراق بووەتە چوارەم گەورەترین هەناردەکاری نەوت بۆ چین

 

بەپێی داتای گومرگەکانی چین، لە مانگی تەمموزدا عێراق 4 ملیۆن و 360 هەزار تۆن نەوتی هەناردەی چین کردووە، کە دەکاتە 33 ملیۆن و 330 هەزار بەرمیل.

 

بەم پێیە، عێراق لەو مانگەدا رۆژانە ملیۆنێک و 94 هەزار و 516 بەرمیل نەوتی هەناردەی چین کردووە.

 

بەراورد بە حوزەیرانی ئەم ساڵ، لە تەمموزدا هەناردەی نەوتی عێراق بۆ چین 12.1٪ کەمبووەتەوە.

 

لە حوزەیرانی ئەمساڵیشدا عێراق رۆژانە ملیۆنێک و 392 هەزار و 516 بەرمیل نەوتی هەناردەکردبوو. لەو مانگەدا، رووسیا، سعودیە و مالیزیا لەپێش عێراقەوە بوون لە هەناردەی نەوت بۆ چین.

 

رووسیا بە ملیۆنێک و 760 هەزار بەرمیل نەوتی رۆژانە، سعودیە بە ملیۆنێک و 500 هەزار و، مالیزیاش بە ملیۆنێک و 460 هەزار بەرمیل نەوتی رۆژانەوە، سێ گەورەترین هەناردەکاری نەوت بوون بۆ چین.

 

لە تەمموزی ئەمساڵدا، چین بە تێكڕا رۆژانە 8 ملیۆن و 929 هەزار و 548 بەرمیل نەوتی هاوردە کردووە. عێراق لە پلەی چوارەەمە لە رووی گەورەترین هەناردەکاری نەوت بۆ ئەو وڵاتە.

 

ئەمە لەکاتێکدایە لە سەرەتای ئەمساڵدا عێراق گەورەترین هەناردەکاری نەوت بووە بۆ چین و 35٪ـی پێویستیی نەوتی ئەو وڵاتەی دابیندەکرد.

 

لەدوای تورکیا و ئێران، چین سێیەم گەورەترین هاوبەشی بازرگانیی هەرێمی کوردستان و عێراقە.

 

لە‌ نیوەی یەکەمی ئەمساڵدا، ئاڵوگۆڕی بازرگانیی نێوان چین و عێراق گه‌یشته‌‌ 27.54 ملیار دۆلار، کە بە بەراورد بە ساڵی رابردوو  14.4% زیادی کردووە. پێشبینی دەکرێت هەناردەی چین بۆ عێراق له‌ ته‌واوی ساڵه‌كه‌دا 16 ملیار دۆلاری ئەمریکی تێپەڕێنێت و بەمەش ژمارەیەکی پێوانەیی تۆمار دەکات.