ئەمریکا سزا بەسەر 10 کەس و لایەنی سەر بە حەماسدا دەسەپێنێت
رووداو دیجیتاڵ
وەزارەتی گەنجینەی ئەمریکا سزای بەسەر 10 کەس و لایەنی سەر بە حەماسدا سەپاند، وەزیری گەنجینەش دەڵێت، رێوشوێنی خێرا و یەکلاییکەرەوە بەرامبەر پشتیوانانی دارایی حەماس دەگرنەبەر.
وەزارەتی گەنجینەی ئەمریکا ئەمڕۆ (چوارشەممە، 18-10-2023) لە راگەیێندراوێکدا رایگەیاند، سزاکان بەپێی فەرمانی جێبەجێکاریی پەیوەست بە تیرۆرەوە سەپێنراون و نۆ کەس و لایەنێکیان کردووەتە ئامانج.
وەزارەتی گەنجینەی ئەمریکا دەشڵێت، ئەو کەس و لایەنانە لە چەند شوێنێکن، لەنێویاندا غەززە، سوودان، تورکیا، جەزائیر و قەتەر.
جانێت یێلێن، وەزیری گەنجینەی ئەمریکا رایگەیاند، ئەمریکا دوای هێرشەکەی حەماس بۆ سەر ئیسرائیل، رێوشوێنی خێرا و یەکلاییکەرەوە دەگرێتەبەر بۆ بەئامانجگرتنی ئەو کەسانەی پشتیوانیی دارایی حەماس دەکەن و ئاسانکاریی بۆ دەکەن.
یێلێن دەشڵێت، "بەردەوام دەبین لە گرتنەبەری هەموو هەنگاوە پێویستەکان بۆ ئەوەی تیرۆریستانی حەماس لە توانای کۆکردنەوە و بەکارهێنانی پارە بۆ ئەنجامدانی کردەوەی دڕندە و تیرۆرکردنی گەلی ئیسرائیل بێبەش بن."
وەزیری گەنجینەی ئەمریکا باسی لەوەشکردووە، "وەزارەتی گەنجینە مێژوویەکی دوورودرێژی لە پچڕاندنی کاریگەرانەی دارایی تیرۆردا هەیە و بەردەوامیش دەبین لە بەکارهێنانی ئامرازەکانمان دژی حەماس".
دوێنێ (سێشەممە) برایان نێڵسن، یاریدەدەری وەزیری گەنجینەی ئەمریکا بۆ کاروباری تیرۆر و دارایی نایاسایی، لە کۆنفرانسی دیلۆیتدا بۆ رووبەڕووبوونەوەی سپیکردنەوەی پارە رایگەیاند، ئەمریکا پلانەکانی نوێدەکاتەوە بۆ بەدواداچوونی رێڕەوی دارایی حەماس و، داواشی کردووە هاوپەیمانانی ئەمریکا و کەرتی تایبەتیش هەمان کار بکەن، ئەگەرنا "ئامادە بن بۆ ئەوەی رووبەڕووی ئەنجامەکانی ببنەوە".
نێڵسن گوتیشی، "ئێمە، ناتوانین بەرگەی ئەوە بگرین پارە لە سیستمی نێودەوڵەتییەوە بۆ چالاکییە تیرۆریستییەکانی حەماس بڕوات و رێگەشی پێ نادەین".
ئەم هەنگاوەی گەنجینەی ئەمریکا لەکاتێکدایە، جۆ بایدن، سەرۆکی ئەمریکا ئەمڕۆ سەردانی ئیسرائیلی کرد و لەگەڵ بنیامین نەتەنیاهوو، سەرۆکوەزیرانی ئیسرائیل کۆبووەوە.