رووسیا دەست بەسەر زیاتر لە 750 ملیۆن دۆلاری دوو بانکی ئەورووپیدا دەگرێت

 

بەپێی بەڵگەنامەکان، بڕیارەکە 16ـی ئەم مانگە لەلایەن دادگەیەکی شاری سانت پترسبۆرگەوە دراوە. 

 

سامانی ئەو دوو بانکە کە دەستیان بەسەردا گیراوە، دەگاتە 764 ملیۆن و 790 هەزار دۆلار؛ 260 ملیۆن دۆلار سامانی بانکی دۆیچە و، 504 ملیۆنیشی سامانی یونیکریدیتە.

 

بانکی دۆیچە ئەڵمانی و، یونیتکریدیتیش ئیتاڵییە. هەردوو بڕیارەکە بەجیا و لە یەک رۆژدا دراون. 

 

بڕیارەکە لە وەڵامی سکاڵایەکی گرووپی 'رووس-خیم-ئەڵایانس' بووە. گرووپەکە پێش شەڕی ئۆکراینا بەنیاز بووە وێستگەیەکی گەورەی پاڵاوتن و شلکردنەوەی گاز بە هاوئاهەنگی لەگەڵ کۆمپانیای 'لیندێ'ـی ئەڵمانی دروستبکات، بەڵام ئەوەی دووەمیان بەهۆی شەڕی ئۆکرایناوە لە پڕۆژەکە کشایەوە. 

 

بانکەکانی دۆیچە و یونیکریدیت سپۆنسەر و دەستەبەرکاری پڕۆژەکە بوون. ئەوانیش کشاونەتەوە، بۆیە گرووپی رووس-خیم-ئەلایانس سکاڵای لە دژیان تۆمارکردووە.

 

رووس-خیم-ئەلایانس لە چەند کۆمپانیایەکی رووسیی بواری گاز پێکدێت، دیارترینیان گازپرۆمی گەورەترین کۆمپانیای بوارەکەیە لە رووسیا. 

 

لەدوای دەستپێکی شەڕی ئۆکرایناوە، ناکۆکی کەوتە نێوان رووسیا و یەکێتیی ئەورووپا، بەهۆیەوە زۆرینەی بانکە ئەورووپییەکان لە رووسیا کشانەوە.

 

یونیکریدیت یەکێک بوو لەو بانکە ئەورووپییانەی هەر زوو بووە قوربانیی شەڕەکە و نەیتوانی خۆی لە رووسیا دەرباز بکات. 

 

بانکەکە ساڵی رابردوو گفتوگۆی فرۆشتنی لقەکانی لە رووسیا دەستپێکرد، بەڵام بە ئەنجام نەگەیشت.