بەهای یەک دۆلار نزیک دەبێتەوە لە 100 هەزار تمەن
رووداو دیجیتاڵ
لەگەڵ کردنەوەی بازاڕی دۆلارەکەی سلێمانی نیوەڕۆی ئەمڕۆ 100 دۆلار بە 9 ملیۆن و 850 هەزار تمەن مامەڵەی پێوە کرا، واتە یەک دۆلار بەرامبەر بە 98 هەزار و 500 تمەنە.
ئێوارەی دوێنێ (دووشەممە، 18-3-2025) لەگەڵ داخستنی بازاڕی دۆلارەکەی سلێمانی، هەر دۆلارێک گەیشتە 99 هەزار تمەن.
ئیسماعیل محەممەد، شارەزا و ئاڵوگۆڕکاری دراو لەو بازاڕە بە رووداوی گوت، ئەو نرخە پێشبینیکراو بوو، هێرشی ئەمریکا بۆ سەر حووسییەکان و هەڕەشەی دۆناڵد ترەمپ، سەرۆکی ئەمریکاش لە ئێران، هۆکاری دابەزینی بەهای تمەنن.
دەستپێکردنەوەی هێرشی ئیسرائیل بۆ سەر غەززە هۆکارێکی دیکەیە کە دەکرێت زیاتر نرخی تمەن دابەزێنێت.
ترەمپ هەڕەشە لە ئێران دەکات و دەڵێت، ئەگەر جارێکی دیکە حووسییەکان هێرش بکەن، یەخەی ئەوان دەگرن و ئەوان بە بەرپرسیار دەزانن.
لە بازاڕەکانی رۆژهەڵاتی کوردستان و ئێران، هەر دۆلارێک بە 95 بۆ 96 هەزار تمەنە. ئیسماعیل محەممەد دەڵێت، هۆکاری ئەو جیاوازییە خواست و خستنەڕووە.
دەشڵێت، ئێستا ئەگەری گەیشتنی یەک دۆلار بە 100 هەزار تمەن زۆر بەهێزە. لەم دۆخەی ئێستا بەئاسانی ئاستی 100 هەزار تمەنیش بەرامبەر بە دۆلار دەشکێندرێت.