جەنەراڵ ئەلیکتریک: لە رێگەی تەکنەلۆژیای دیجیتاڵەوە 9 هەزار مێگاوات کارەبای عێراق زیاد دەکەین

 

رۆژی هەینی، 15-3-2024، جەنەراڵ ئەلیکتریک، گەورە کۆمپانیای ئەمریکیی بواری کارەبا رایگەیاند، ئامادەیە تەکنەلۆژیای دیجیتاڵی لە بەرهەمهێنانی وزە لە عێراق جێبەجێ بکات.

 

وەک کۆمپانیاکە دەڵێت، بەکارهێنانی ئەو تەکنەلۆژیایە سوودی دەبێت و بەپێی خەمڵاندنەکانیان، لە رێگەی رێککەوتن لەگەڵ وەزارەتی کارەبای عێراق، دەتوانن 9 هەزار مێگاوات بەو رێگەیە بەرهەم بهێنن.

 

رەشید جەنابی، بەڕێوەبەری جەنەراڵ ئەلیکتریک لە عێراق بە ئاژانسی هەواڵی عێراقیی راگەیاندووە: "کۆمپانیاکە خەریکی رێککەوتنێکی درێژخایەنە لەگەڵ وەزارەتی کارەبای عێراق بە مەبەستی دڵنیابوون لە توانای بەرهەمهێنانی 9 هەزار مێگاوات کارەبا لە یەکەکانی گازی کۆمپانیاکە لە عێراق".

 

جەنابی گوتیشی: "رێککەوتن لەگەڵ وەزارەتی کارەبا دەبێتە هەنگاوێکی گەورە بۆ وەبەرهێنان و دامەزراندنی ناوەندی چاودێری و کۆنترۆڵ بۆ بەردەوامیدان بە سیستمەکە و زیادکردنی لێهاتووییەکەی".

 

بەڕێوەبەری کۆمپانیاکە لە عێراق باس لەوەشدەکات، هاوشان لەگەڵ خستنەکاری تەکنەلۆژیای دیجیتاڵی، "کاری بەردەوامیش دەکرێت بۆ زیادکردنی توانای بەرهەمهێنانی سیستمەکەمان و زۆرترین سوودوەرگرتن لە سووتەمەنیی بەردەست بۆ زیادکردنی ئەوپەڕی توانای بەرهەمهێنانی یەکەکان".

 

بە گوتەی ئەو بەڕێوەبەرە: "رێککەوتنەکە دامەزراندنی ناوەندێکی راهێنانیش دەگرێتەوە بۆ برەودان بە توانا تەکنیکییەکانی کارمەندانی وەزارەتی کارەبای عێراق".