ماکرۆن بۆ ئەوروپا: پشتبەستنی "لەڕادەبەدەر" بە دۆلار کەمبکەنەوە

 

لە چاوپێکەوتنێکدا لەگەڵ ماڵپەڕی پۆڵیتیکۆ، ئیمانوێل ماکرۆن، سەرۆککۆماری فەرەنسا رایگەیاند، پێویستە سەرکردەکانی ئەوروپا پەیوەندییەکان لەگەڵ ئەمریکا نەرم بکەنەوە و سەرنجیان لەسەر ئەوە بێت خۆیان لە ناکۆکیی چاوەڕوانکراوی ئەمریکا و چین بەهۆی تایوانەوە بەدووربگرن.

 

گوتەکانی ماکرۆن دوای سەردانێکی سێ رۆژەی هات بۆ چین و کۆبوونەوەی لەگەڵ شی جینگ پین، سەرۆکی چین.

 

ماکرۆن دەشڵێت: "کاتێک دێتە سەر باسی پشتبەستنی جیهان بە دۆلار، دەبێت ئەوروپا پشتبەستنی لەڕادەبەدەری بە دۆلاری ئەمریکی کەمبکاتەوە."

 

سەرۆککۆماری فەرەنسا باس لەوەش دەکات: "ئەگەر گرژییەکان لەنێوان ئەو دوو زلهێزە [ئەمریکا و چین] هەڵبکشێن، ئەوا نە کات و نە سەرچاوەی پێویستمان دەبێت تاوەکو پشتیوانی دارایی ئۆتۆنۆمییە ستراتیژییەکەمان بکەین." 

 

دەیان ساڵە دراوی دۆلار رۆڵێکی گرنگی بینیوە لە بازرگانی و سیستمی نەختینەیی جیهان و تاکە دراوی یەدەگی جیهانە زۆرترین بەکارهێنانی لە مامەڵە نێودەوڵەتییەکاندا هەیە، بەڵام لەمدواییانەدا کۆمەڵێک جووڵە و هەنگاو بە ئاراستەی کۆتاییهێنانی هەژموونی دۆلار دروستبوون.

 

بەپێی راپۆرتەکان، گرووپی وڵاتانی بریکس لە هەوڵدایە دراوێکی جێگرەوە دروستبکات کە بەکارهێنانی دۆلار لە جیهاندا سنوورداربکات و رەنگە نرخی کانزا و کاڵاکانی دیکەی پێ دیاری بکرێت.

 

گرووپی بریکس هاوپەیمانێتییەکی ئابوورییە و ناوەکەی کورتکراوەی وڵاتانی بەشداری گرووپەکەیە؛ بەرازیل، رووسیا، هیندستان، چین و ئەفریقای باشوور.  

 

هاوکات باس لەوەش دەکرێت، ژمارەیەک وڵاتی دیکە، لەوانە سعودیە، ئێران، تورکیا و میسریش ئارەزووی خۆیان لە بوون بە ئەندامی بریکس دەربڕیوە.