Beşek ji Kurdên Stenbolê ji CHPê bi gazinc in

Stenbol (Rûdaw) – Di hilbijartinên 31ê Adarê de ji ber Partiya Demokratîk a Gelan (HDP) û Kurdan piştgiriyeke mezin li Partiya Komar a Gel (CHP) kirine niha ji bo dijberiya danîna qeyûman hêviya Kurdan jî ji CHP heye da sekneke baştir nîşan bidin.

 

Piştî danîna qeyûman li ser 3 şaredariyên Bakurê Kurdistanê Partiya Demokratîk a Gelan (HDP) gelek caran bang li CHP dike da ew jî di çalakiyên nerazîbûnan de ligel wan bin. Lê CHP di asta herî bilind de daketina kuçeyan red dike.

Kurdên Stenbolê ku namzetê CHP kirin şaredar ji CHP bi gazinc in, lê ew dibêjin ger careke din pêwîst be ew dê dîsa piştgiriyê bidin wan. Beşeke biçûk jî dibêjin ew carek din piştgiriyê nadin CHPê.

Ji CHPê Şaredarê Stenbolê Ekrem Îmamoglû seredana Amedê dike û Muharrem Înce jî diçe Mêrdînê, lê ji hewlên takekesî pê ve CHP piştgiriya HDPê nake.

Serokê Giştî yê CHPê Kemal Kiliçdaroglû dibêje nabe ku ew dakevin kuçeyan, lê di nava CHPê de beşek daxwaza sekneke baştir dike.

HDPyî dibêjin eger CHP bêdeng be dê qeyûm li Stenbol û Enqere jî bên danîn û ‘Bloka Demokrasiyê’ bi danîna qeyûman di ezmûneke girîng de ye.