دادگەی ئەمریکا بڕیارێکی سەردەمی ئیدارەی ترەمپ لەبارەی پەنابەران درێژدەکاتەوە

 

ئانخێلس کۆلمینارێس، کۆچبەری ڤەنزوێلی دەڵێت، "هێشتا هیچ رێگەچارەیەکمان نییە؛ چاوەڕێین لە کاژێرەکانی داهاتوودا شتێک رووبدات. دەرفەتی ئەوەدێت بە نایاسایی بپەڕینەوە."

 

ئێستا 10 بۆ 12 هەزار کۆچبەر لەنێو مەکسیک گیرساونەتەوە و دەیانەوێت بچنە نێو ئەمریکا. 

 

چاوەڕوان دەکرێت سیاسەتی تەندروستیی گشتیی ئەمریکا کە بە "تایتڵ 42" ناودەبرێت و بەهۆی کۆرۆناوە سەپێندراوە، تاوەکو هاوینی 2023 بە جێبەجێکراوی بمێنێتەوە. ئەمەش مانای وایە پاسەوانی سنووریی ئەمریکا بەدرێژایی 3000 کیلۆمەتر ئەرکێکی زەحمەتی لەئەستۆدایە کە رێگەگرتنە لە کۆچبەران بۆ ئەوەی نەچنە نێو وڵاتەکەوە.

 

جۆ بایدن، سەرۆکی ئەمریکا گوتی، "کاردانەوەی من ئەوەیە، روونە کە دادگە تاوەکو مانگی حوزەیران بڕیار نادات و لە هەمان کاتدا، ئێمە دەبێ بەجێبەجێکراوی بیهێڵینەوە، بەڵام پێموایە درەنگ دەکەوێت."

 

"تایتڵ 42" لە ئاداری 2020ـەوە بۆ رێگریکردن لە بڵاوبوونەوەی کۆرۆنا چووە واری جێبەجێکردنەوە؛ لەوکاتەوە 2.5 ملیۆن مافی پەناخوازی لەلایەن بەرپرسانی ئەمریکاوە بۆ کۆچبەران رەتکراوەتەوە.

 

خەڵک لە وڵاتانی گواتیمالا، هندۆراس، سەلڤادۆر، ڤەنزوێلا و مەکسیک بەهۆی هەژاری و خراپیی دۆخی ئابوورییان، هەوڵی پەڕینەوەی ئەمریکا دەدەن.

 

تەنیا لە مانگی ئەیلوولی ئەمساڵدا، پاسەوانی سنووریی ئەمریکا 77 هەزار و 302 کۆچبەری لەکاتی پەڕینەوە دەستگیرکردووە، ئەم ژمارەیەش 245٪ زیاترە لە ئەیلوولی 2021.