نەرویج دەیەوێت فرۆشتنی ئەو ئۆتۆمبێلانە رابگرێت کە بە سووتەمەنی کاردەکەن

 

 

کیم کلیمتسن، سەرۆکی بەشی فرۆشتنی کۆمپانیای ڤۆلکسڤاگن لە نەرویج دەڵێت: "لە 1ی ئەیلوولی ئەم ساڵەوە، هەموو ئەو ئۆتۆمبێلانەمان لابردوون کە بە سووتەمەنی نەریتی کاردەکەن. ئێستا تەنیا ئۆتۆمبێلی کارەبایی دەفرۆشین." 

 

ئۆسلۆ دەبێتە یەکەم وڵات ئەم بڕیارە جێبەجێ بکات. 

 

بە گوێرەی بەرپرسانی نەرویج، ئابی ئەم ساڵ 94٪ی کڕین و فرۆشتنی ئۆتۆمبێل لەو وڵاتە هی ئۆتۆمبێلی کارەبایی بووە. 

 

ئەیلوولی ئەمساڵیش، بۆ یەکمجار ژمارەی ئۆتۆمبێلە کارەباییەکان زیاتر بوو لەوانەی بە بەنزین کار دەکەن، ژمارەکە 754 هەزار و 303 دانە بەرامبەر 753 هەزار بوو. 

 

سیسیلی کنیب کرۆگلد، بەرپرسی گواستنەوەی ئۆسلۆ دەڵێت: "پێموایە یەکێک لەو هۆکارانەی بۆچی نەرویج سەرکەوتوو بووە ئەوەیە کە ئێمە لەو شتانە تێگەیشتین کە دەبنە هۆی سەرکەوتنی هەنگاوەکەمان، کە گرنگترینیان کڕیارەکانن. پێموایە دانانی ئامانجی 2025 ئاماژەیەکی روونە بۆ بازاڕ." 

 

هاوکات، کرستینا بو، سکرتێری گشتیی سەندیکای ئۆتۆمبێلی کارەبایی نەرویج ئاماژە بەوە دەکات: "ئەمە تەنیا بەهۆی ئەوەوە نییە کە خەڵک بیانەوێت کەشوهەوا پاکبکەنەوە چونکە ئۆتۆمبێلی کارەبایی زۆر گرانە. پێموایە هۆکاری سەرەکی سیستەمی باج، یاساکانمان و ئەو دەرفەتانەن کە لەو بوارەدا رەخسێندراون." 

 

مینی پاس و ئۆتۆمبێل ساڵانە نزیکەی سێ ملیار و 530 ملیۆن تۆن گازی دوانۆکسیدی کاربۆن دەردەنە بەرگە هەوای زەویەوە. 

بە گوێرەی ئاژانسی نێودەوڵەتی وزە، بۆ کەمکردنەوەی کاریگەرییەکەکانی گۆڕانی کەشوهەوا پێویستە تاوەکو 2030، 300 ملیۆن ئۆتۆمبیل کە دەکاتە 20٪ی کۆی ئۆتۆمبێلەکانی جیهان بکرێنە کارەبایی.