سەرۆکوەزیرانی ئیسرائیل: بۆ بەرگری و هێرشکردن ئامادەین

 

لە دوایین ئەو تەرمانەی گەڕێندرانەوە و نێژران؛ یاگیڤ بوچشتابی تەمەن 35 ساڵ بوو، یەکێک لەو 6 تەرمەی رۆژی چوارشەممە سوپای ئیسرائیل لە غەززە دۆزینییەوە.

 

یاگیڤ لەگەڵ ریمۆنی هاوژینی لە 7ـی ئۆکتۆبەری 2023 لەلایەن حەماسەوە رفێندران، بەڵام لە تشرینی دووەمی هەمان ساڵ لە رێککەوتنێکی ئاگربەست ژنەکەی ئازادکرا.

 

ئیشتەر بوچشتاب، دایکی بارمتەیەکی ئیسرائیل دەڵێ "لە چ جیهانێک بووە دایک چاوەڕوانی کۆتاییهاتنی کابووس بکات تاوەکو تەرمی کوڕەکەی بۆ ناشتن بۆ بگەڕێننەوە؟ لە چ جیهانێک بووە دایک سوپاسی حکومەت بکات بۆ گەڕاندنەوەی تەرمی کوڕەکەی کە بەجێهێڵدراوە و کوژراوە؟ لە چ جیهانێک بووە خێزانەکان بپاڕێنەوە و بگرین بۆ ئەوەی کەسوکاریان بە زیندوویی یان مردوویی بۆ بگەڕێننەوە؟"

 

لەکاتێکدا کەسوکاری 110 بارمتەی بندەستی حەماس دەستیان لەسەر دڵیانە و پەرۆشی گەڕانەوەی ئازیزانیانن، بنیامین نەتەنیاهوو دەستبەرداری درێژەدان بە شەڕ نەبووە. بەمەش خەریکە دەرفەتی رێککەوتنی ئاگربەستی غەززە لەدەستدەچێت.

 

بەردەوامی شەڕ واتا کوژرانی خەڵکی زیاتر لە غەززە، لەنێویاندا بارمتە ئیسرائیلییەکان.

 

سەرۆکوەزیرانی ئیسرائیل دەڵێ "ئامادەی هەموو سیناریۆیێکین، ئینجا چ بەرگریکردن بێت چ هێرشکردن."

 

ئەنتۆنی بلینکن، وەزیری دەرەوەی ئەمریکا دوای 9 سەردان بۆ رۆژهەڵاتی نێوەڕاست و لەدوایین سەردانی و دوای 3 کاژێر کۆبوونەوە، نەیتوانی نەتەنیاهوو بە ئاگربەست رازی بکات. حەماسیش دەڵێت ئەمریکا کات بۆ ئیسرائیل دەکڕێت.

 

بەگوێرەی میدیای ئیسرائیلی، نەتەنیاهوو لە کۆبوونەوەیەکدا لەگەڵ کەسوکاری بارمتەکان گوتوویەتی، لەگەڵ بلینکن رێککەوتووە هێزەکانی ئیسرائیل لە غەززە و سەر سنووری میسر بمێننەوە، بەڵام بلینکن بۆ میدیای بەریتانی روونیکردەوە کە کشانەوەی هێزەکان لە پلانی پێشنیازە نوێیەکەدا هەیە، بەڵام بە چ شێوەیەک دەکشێنەوە؟ئەمەیان دیار نییە و حەماسیش پێداگرە لەسەر ئەو پێشنیازەی کە مانگی تەمووز جۆ بایدن خستییەڕوو، کە جەخت لە کشانەوەی هێزەکانی ئیسرائیل لە غەززە دەکاتەوە، حەماس دەڵێت لەو پێشنیازە زیاتر قبوڵ ناکەن.