لە چین بەهۆی لێچوونی گاز رێستۆرانتێک تەقییەوە و 31 کەس گیانیان لەدەستدا

 

میدیای فەرمی چین ئەمڕۆ (پێنجشەممە، 22-6-2023) رایگەیاند "بەهۆی لێچوونی گازی شلکراوەوە، تەقینەوەیەک لە رێستۆرانتێکی گۆشت برژاندن روویدا". تەقینەوەکە لەکاتێکدایە، فێستیڤاڵی بەلەمی دراگۆن بەڕێوەدەچێت و لە رۆژی یەکەمیدا بووە.

 

9 کەس لە دوای تەقینەوەکە دەستگیرکران، کە پێکهاتبوون لە خاوەن و ستافی رێستۆرانتەکە.

 

جگە لەوانەی گیانیان لەدەستداوە، 7 کەسی دیکە لە رووداوەکەدا برینداربوون و چارەسەری پزیشکییان بۆ کراوە. دوو کەسی دیکەش بە سەختی سووتاون و دوو کەسی دیکەش بەهۆی پارچەی شووشەوە بە سووکی برینداربوون.

 

بەشێک لەوانەی گیانیان لەدەستداوە، خوێندکاری ئامادەیی و هاووڵاتی خانەنشینن. زۆربەی ئەوانەی گیانیان لەدەستداوە بەهۆی تەنگەنەفەسییەوە بووە، بەهۆی ئەو دووکەڵەی ئاگرەکە دروستیکردووە.

 

تەقینەوەکە رۆژی چوارشەممە، کاژێر 3:40 خولەکی دوانیوەڕۆ بەکاتی هەولێر لە رێستۆرانتی فویانگ روویداوە کە لە ناوجەرگەی شاری ینچوانە.

 

میدیای فەرمی چین باسی لەوەکردووە، شی جین پینگ، سەرۆکی چین لەسەر رووداوەکە هاتووەتە دەنگ و داوایکردووە تەواوی بریندارەکان بە زووترین کات چارەسەربکرێن و رێکارەکانی سەلامەتی تووندتر بکرێن.

 

هەروەها سەرۆکی چین داوایکردووە، بە زووترین کات لێکۆڵینەوەی ورد لە هۆکاری سەرەکیی رووداوەکە بکرێت و ئەوانەی بەرپرسن لێی، بە سزا بگەیێنرێن.

 

وەزارەتی فریاگوزاری خێرای چین دەڵێت، هەر لە سەرەتای رووداوەکەدا، 20 ئۆتۆمبێل و 100 ئەندامی تیمەکانیان گەیشتوونەتە شوێنی تەقینەوەکە و لە ماوەی کەمتر لە 20 خولەکدا، تەواوی خەڵکەکەیان رزگارکردووە.