لەسەر هێرشکردنە سەر باڵیۆزخانەکەیان، سوێد بەرپرسی کاروباری دەرەوەی عێراق لە ستۆکهۆڵم بانگهێشت دەکات

 

 

رۆژی پێنجشەممە 20-07-2023 وەزارەتی دەرەوەی سوێد لە راگەیێندراوێکدا لەبارەی هێرشکردنە سەر باڵیۆزخانەکەیان لە بەغدا رایگەیاند، "ئەوەی روویداوە بە هیچ شێوەیەک جێگەی قبووڵکردن نییە و حکومەتیش بە تووندترین شێوە سەرکۆنەی دەکات."

 

تۆبیاس بیڵسترۆم، وەزیری دەرەوەی سوێد لە راگەیێندراوەکەدا دەڵێت، "بەگوێرەی پەیماننامەی ڤیەننا، بەرپرسیارێتیی بەرپرسانی عێراقە پارێزگاری لە باڵیۆزخانەکان و دیپلۆماتکارەکانی بکەن."

 

سوێد دەڵێت، ستافی باڵیۆزخانەکەیان سەلامەتە بەبێ ئەوەی هیچ زانیارییەکی دیکە دەربارەی زەرەر و زیانەکانی هێرشەکە ئاشکرا بکات.

 

بەرەبەیانی ئەمڕۆ پینجشەممە خۆپێشاندەران جارێکی دیکە هەڵیانکوتایە سەر باڵیۆزخانەی سوێد لە بەغدا و بەشێکی باڵەخانەکەیان سووتاند. ئەمەش لە کاتێکدایە، بڕیارە سەلوان مۆمیکا، هاووڵاتیی بە رەچەڵەک عێراقی و هاووڵاتییەکی دیکە، ئەمڕۆ لەبەردەم باڵیۆزخانەی عێراق لە ستۆکهۆڵم قورئانی پیرۆز و ئاڵای عێراق بسووتێنن.

 

سەبارەت بە هێرشکردنە سەر باڵیۆزخانەی سوێد لە بەغدا، وەزارەتی دەرەوەی عێراق کارەکە سەرکۆنە دەکات و دەڵێت، ئەو کارە پەلاماردانی نێردەی دیپلۆماسی و هەڕەشەکردنە لە ئاسایشیان. داواشی کردووە، لێکۆڵینەوەیەکی بەپەلە لە رووداوەکە بکرێت و "بەگوێرەی یاسا بکەرانی ئەو کارە سزا بدرێن."

 

وەزارەتی دەرەوەی عێراق پێشتر سووتاندنی قورئانی پیرۆزیشی لەلایەن سەلوان مۆمیکاوە سەرکۆنە کردبوو، بە فەرمییش داوای کردووە هاووڵاتییەکە دیپۆرتی عێراق بکرێتەوە.