بڕیارە ئەم هەفتەیە ئانتۆنی بلینکن و سێرگی لاڤرۆڤ لەسەر دۆخی ئۆکراینا کۆببنەوە

 

ئاسەواری تۆپ و هاوەنباران بە چەند باڵەخانەیەکی شاری لوهانسک لە هەرێمی دۆنباس لە رۆژهەڵاتی ئۆکرایناوە دیارە. رۆژێک پێشتریش باخچەیەکی منداڵان لە هەمان شار کرایە ئامانج کە زیاتر لە 20 منداڵی تێدابووە، دیارنییە کێیە ئەو هێرشانە ئەنجامدەدات، بەڵام ئەمریکا دەمێکە هۆشداریداوە کە رووسیا بەنیازە سیناریۆیێک بۆ داگیرکردنی ئۆکراینا دروستبکات.

 

ئانتۆنی بلینکن، وەزیری دەرەوەی رووسیا دەڵێت، "لەگەڵ ئەوەی هەرچیەک لە توانامداندابێت دەیکەین بۆ ئەوەی روونی بکەینەوە کە رێگەی دیپلۆماسی هەیە و دەبێت ناکۆکییەکان لەڕێگەی دیالۆگ و دیپلۆماسی چارەسەربکرێن، ئێمە زۆر نیگەرانین کە ئەمە ئەو رێگەیە نییە رووسیا پشتی پێیبەستیوە."

 

بەرپرسانی ئەمریکی جارێکی دیکە دەنگۆی ئەوە بڵاودەکەنەوە، رووسیا لە چەند رۆژی داهاتوو لەڕێگەی تانک، فرۆکەی جەنگی و ئەلیکترۆنی هێرشدەکاتە سەر ئۆکراینا، بەڵام لە کۆنفرانسی ئاسایشی میونشن هێشتا هیوایەک بە دیپلۆماسی و دانیشتن لەسەر مێزی گفتوگۆماوە. 

 

ئانالێنا بایربۆک، وەزیری دەرەوەی ئەڵمانیا باس لەوە دەکات، "130 هەزار سەرباز لەسەر سنوور، قورسە وەکو هەڕەشە وەرینەگرین. ئەوانەی دەیانەوێت لە ئەمن و ئاسایشدا لەگەڵ یەک بژین هەڕەشە لە ئەوانی دیکە ناکەن. ئەوانەی دەیانەوێت لە ئاسایش بەیەکەوە بژین، لەسەر مێزی گفتوگۆ قسە دەربارەی ئاسایشی هاوبەشمان دەکەن."

 

ئەمریکا و هاوپەیمانانی دووپاتیدەکەنەوە کە ئامادەن سزای قورس بەسەر مۆسکۆ بسەپێنن ئەگەر هێرشبکات، لە نێوەڕاستی ئەو گرژیانە، بڕیارە ئەم هەفتەیە ئانتۆنی بلینکن و سێرگی لاڤرۆڤ کۆببنەوە، دواین کارتی دیپلۆماسی بۆ رێگریکردن لە شەڕێک تاقیبکەنەوە، کە سکرتێری گشتیی ناتۆ بە کارەساتبار ناوی دەبات، ئەگەر رووبدات."