ترەمپ و هاریس یەکدی بە لەنێوبردنی کۆمەڵگەی ئەمریکی تۆمەتبار دەکەن

 

 

کامالا هاریس، بەربژێری دیموکراتەکان بۆ پۆستی سەرۆکایەتیی ئەمریکا دەڵێت، "شەرمەزارییەکی لەڕادەبەدەرە، دڵم بۆ ئەم کۆمەڵگەیە دەسوتێت، ترەمپ بە هەموو لایەکدا درۆ بڵاودەکاتەوە. ئەو لە بەرپرسیارێتی تێناگات و نازانێت چی بەو مایکرۆفۆنە دەڵێت و چ کاریگەرییەک جێدەهێڵێت. کاتی ئەوە هاتووە خەڵک لە رێگەی دەنگدانەوە رێگەی پێ نەدات مایکرۆفۆن بەکاربهێنێتەوە."

 

دۆناڵد ترەمپ، بەربژێری کۆمارییەکان بۆ پۆستی سەرۆکی ئەمریکا هەڵمەتەکەی لە ویلایەتی میشیگن دژ بە هاریس گەرم کرد و دەڵێت، "ئەگەر نەیبەمەوە، شتێکتان بەناوی پیشەسازیی ئۆتۆمبێل بۆ نامێنێتەوە، لە ماوەی دوو بۆ سێ ساڵدا هەمووی دەکەوێتە دەستی چینییەکان. هاریس هاوشێوەی بایدن پیشەسازیتان لەنێو دەبات، بە رێگەدان بە هاتنی ئەو کۆچبەرانەش هەڕەشەی سەر کۆمەڵگەی ئەمریکیش زیاتر دەکات."

 

میشیگن یەکێكە لە ویلایەتە یەکلایی نەبووەوەکان، کە ترەمپ و هاریس شەڕی لەسەر دەکەن؛ ویلایەتەکە بە پیشەسازیی ئۆتۆمبێل، تەکنەلۆجیا و کشتوکاڵی ناسراوە.

 

جۆن راسڵ، دانیشتووی میشیگن دەڵێت، "نرخی گاز و خۆراک گرانە، لە سەردەمی ترەمپدا هیچ شەڕێك نەبوو، سنوورەکان داخرابوون، پیشەسازیی ئۆتۆمبێلمان باش بوو، هەموو شتێك باشتر بوو."

 

یەکێک لە تایبەتمەندییەکانی ئەو ویلایەتە، ئەو 325 هەزار دەنگدەرە عەرەبەیە کە لە شێوازی مامەڵەی ئیدارەی بایدن، لەنێویاندا هاریسی جێگری، لەگەڵ شەڕی غەززە ناڕازین.

 

دووریش نییە بەشی زۆریان دەنگ بە ترەمپ بدەن و بیکەنە براوەی 15 دەنگی کۆمەڵەی هەڵبژاردنەکەی.

 

لە 2016 ترەمپ میشیگنی بە 11 هەزار دەنگ لە هیلاری بردەوە و لە 2020 بە 150 هەزار دەنگ بە بایدنی دۆڕاند.