پیاوێکی 99 ساڵ لە بەریتانیا زیاتر لە 21 ملیۆن دۆلار بۆ تووشبووانی کۆرۆنا کۆدەکاتەوە
سەربازێکی جەنگی جیهانیی دووەم کە تەمەنی 99 ساڵانە و پلانی هەبوو هەزار پاوەند بۆ تووشبووانی کۆرۆنا کۆبکاتەوە، بەڵام هاوکارییەکان لە پێشبینییەکانی زیاتر دەرچوون و تاوەکو ئێستا 17 ملیۆن پاوەند، (زیاتر لە 21 ملیۆن دۆلار)ـی کۆکردووەتەوە.
تۆم مۆری، کە خۆی ئارەزوو دەکات بە کاپتن تۆم بانگ بکرێت لەڕێگەی وێبسایتێکەوە داوای بەخشینی پارەی کرد بۆ رووبەڕووبوونەوەی کۆرۆنا، ئامانجیشی کۆکردنەوەی هەزار پاوەندی بەریتانی بوو، بەڵام وا دەردەکەوێت ئەو هەنگاوەی زیاتر لە بەشداریکردن لە جەنگی جیهانیی دووەم بەناوبانگی کردووە.
تۆم کە قاچەکانی تەواو نییە، باخچەیەکی هەیە و رۆژانە بەدەوری باخچەکەیدا دەسووڕێتەوە، دەڵێت، بڕیاریداوە 100 جار بەدەوری باخچەکەیدا بسووڕێتەوە. بەردەوامیش بێت لە کۆکردنەوەی پارە و بەخشینی بە سیستەمی تەندروستیی نیشتمانیی بەریتانیا ناسراو بە NHS.
حکومەتی بەریتانیا دەڵێت، بەهۆی ئەو کارەیەوە، سەرۆکوەزیرانی بەریتانیا کە لە چەند رۆژی رابردوو نەخۆشخانەی بەجێهێشت وەکو "پاڵەوان" بیناسێنێت و مەدالیای پێبدات. بۆ ئەو مەبەستەش زیاتر لە 475 هەزار واژۆی بۆ چووە و داوا دەکەن وەکو پاڵەوان بناسێندرێت.
تۆم لە 30ـی نیسان رۆژی یادی 100 ساڵەی لەدایکبوونی دەکاتەوە، گوتەبێژی حکومەتی بەریتانیا دەڵێت، تۆم لە خزمەتی سەربازی، بەشداریکردنی لە جەنگی جیهانی و ئێستاش بەم هەنگاوەی بەردەوامە لە پیشاندانی ئازایەتی و خۆشەویشتی بۆ وڵاتەکەی.