مارکۆ رۆبیۆ: پاراستنی کورد لە سووریا لە بەرژەوەندیی ئەمریکایە

 

رۆژی چوارشەممە، 15ی کانوونی دووەمی 2025، مارکۆ رۆبیۆ، بەربژێری دۆناڵد ترەمپ، سەرۆکی هەڵبژێردراوی ئەمریکا بۆ وەزیری دەرەوە لە ئەنجوومەنی پیران لەلایەن لیژنەیەکی ئەو ئەنجوومەنەوە پێش بوونی بە وەزیر، گفتوگۆی لەگەڵ کرا و ژمارەیەک پرسیاری ئاراستە کرا. 

 

کریس ڤان هۆلن، ئەندامی ئەنجوومەنی پیران لە بەرەی دیموکراتەکان سەبارەت بە بەردەوامی پشتیوانی ئەمریکا بۆ هێزەکانی سووریای دیموکرات (هەسەدە) لە شەڕی دژی داعش، پرسیاری لە رۆبیۆ کرد و ئەویش گوتی، : "بەڵێ بەردەوام دەبین. کوردەکان قوربانی زۆریان داوە و یەکێک بوون لە هۆکارە سەرەکییەکانی تێکشکاندنی داعش، زیاتر لەوەش چەکدارەکانی داعشیان زیندانی کردووە و مەترسییەکی گەورەیان لەسەرە."

 

ئەمریکا نزیکەی دوو هەزار سەربازی لە سووریا هەیە و بە پاڵپشتیکارێکی سەرەکی هێزەکانی سووریای دیموکرات دادەندرێن، کە لەلایەن کوردەوە سەرۆکایەتی دەکرێن.

 

بەربژێری وەزیری دەرەوەی ئەمریکا ئاماژە بەوەش دەکات، "پێویستە ئاگربەستی نێوان تورکیا و هێزە کوردییەکان" بپارێزرێت و دەڵێت: "دەبێت رێگە لەوە بگیرێت کە تورکیا ماوەی گواستنەوەی دەسەڵات لە ئەمریکا بقۆزێتەوە و رێککەوتنەکانی پێشوو پێشێل بکات."

 

سەبارەت بە چارەنووسی سزاکانی سەر سووریا، رۆبیۆ جەخت لەوە دەکاتەوە دەبێت هەڵبگیرێن، چونکە ئەو حکومەتەی سزاکانی بۆ دانراوە ئێستا لە دەسەڵات نییە. هەروەها دەڵێت: "دەرفەتێکی گرنگ هەیە بۆ سەقامگیرکردنی سووریا، چونکە رووسیا و ئێران لەوێ نەماون. ئەگەر ئەم دەرفەتە لەدەست بدەین، لەوانەیە جارێکی دیکە دەستمان نەکەوێتەوە."

 

بەربژێری وەزیری دەرەوەی ئەمریکا هۆشداری دەدات لەوەی دەسەڵاتدارانی نوێی سووریا "رابردوویەکی باش"یان نییە و دەڵێت: "ئەو کەسە نوێیانەی لێپرسراویەتییان لە سووریا وەرگرتووە، ناتوانن لە لێکۆڵینەوەکانی ئێف بی ئای دەربازیان بێت و رابردوویان ئەوە نییە کە دڵخۆش و ئاسوودەمان بکات."

 

رۆژی 8ی کانوونی یەکەمی پار، گرووپە چەکدارەکانی سووریا سەرکەوتووبوون لە رووخاندنی حکومەتی سووریا و حکومەتێکی کاتییان لەو وڵاتە تاوەکو ئاداری داهاتوو دروستکرد. دیارترین گرووپی ئۆپۆزسیۆنی ئەو وڵاتە دەستەی تەحریر شامە کە بەشێک لە سەرکردەکانیان پێشتر لە رێکخراوە "تیرۆرستییەکانی" وەکو قاعیدە و داعش بوون و لە لیستی سزاکانی ئەمریکادان.

 

رۆبیۆ پێیوایە بەرژەوەندیی نیشتمانیی ئەمریکا و رۆژهەڵاتی نێوەڕاست لەوەدایە سووریایەک هەبێت کە "چی دیکە نەبێتە گۆڕەپانی داعش، رێز لە کەمینە ئایینییەکان بگرێت، لە عەلەوییەکانەوە بۆ کریستیانەکان، کوردەکان بپارێزێت و نەبێتە ناوچەیەک کە ئێران بتوانێت لە رێگەیەوە تیرۆرەکەی بڵاوبکاتەوە بۆ حیزبوڵڵا و لوبنان ناسەقامگیر بکات."

 

هەروەها ئاماژە بەوەش دەکات کە دۆخی ئێستای سووریا کاریگەریی لەسەر کێشەی غەززە و تەواوی رۆژهەڵاتی نێوەڕاست هەیە، بۆیە پێویستە هەوڵی سەقامگیرکردنی بدرێت.