پەرلەمانی ئەوروپا خەڵاتی ساخارۆڤ دەبەخشێتە نادیە موراد و لەمیعە بەشار
رووداو - هەولێر
لە پەرلەمانی یەکێتی ئەوروپا خەڵاتی ساخارۆڤ دەدرێتە نادیە موراد و لەمیعە بەشار، ئەوەش دوای ئەوەی مانگی رابردوو ناوی ئەو دوو كچە كوردە ئێزدییە وەك براوەی خەڵاتەكەی ئاشكراكرا.
دلاوەر ئاژگەیی، نوێنەری حکومەتی هەرێمی کوردستان لە یەکێتی ئەوروپا دەڵێت، ئەو خەڵاتە نیشانەی هاوخەمی و هاوسەنگەری گەلانی یەکێتی ئەوروپایە لەگەڵ کورد و بەتایبەتی کوردی ئێزدی.
مانگی رابردوو پەرلەمانی یەکێتی ئەوروپا هەریەک لە نادیە موراد و لەمیعە بەشاری وەک براوەی خەڵاتی ساڵانەی ساخارۆڤی یەکێتی ئەوروپا بۆ ئازادی بیروڕا دەستنیشانکرد.
بڕیارە رۆژی سێشەممە 13-12-2016 لە مەراسیمێکی تایبەتدا لە پەرلەمانی ئەوروپا لە ستراسبۆرگ، مارتن شولتز، سەرۆکی پەرلەمانی ئەوروپا بە ئامادەیی 750 پەرلەمانتاری ئەوروپی، ئەو خەڵاتەیان پێ ببەخشێت.
دلاوەر ئاژگەیی، نوێنەری حکومەتی هەرێمی کوردستان لە یەکێتی ئەوروپا رایگەیاند، وەك نوێنەرایەتی حکومەتی هەرێمی کوردستان بە فەرمی بانگهێشتی ئەو مەراسیمە کراوە. هەروەها هەریەک لە: میر داسن فاروق بەگ، نوێنەری خانەوادەی میری ئێزدیان، میر تەحسین بەگ، خەیری بۆزانی، بەڕێوەبەری گشتی کاروباری ئێزدییان لە وەزارەتی ئەوقاف و کاروباری ئاینی حکومەتی هەرێمی کوردستان، نوێنەری بنکەی لالش لە ئەڵمانیا بەشداری مەراسیمەکە دەبن.
نوێنەری حکومەتی هەرێمی کوردستان ئاماژەی بە گرنگی خەڵاتی ساخارۆڤ دا و رایگەیاند، ئەو خەڵاتە نیشانەی هاوخەمی و هاوسەنگەری گەلانی یەکێتی ئەوروپایە لەگەڵ کورد و بەتایبەتی کوردی ئێزدی لە بەرامبەر ئەو تاوانانەی کە داعش ئەنجامیداوە.
دلاوەر ئاژگەیی هەروەها رایگەیاند "حکومەتی هەرێمی کوردستان و خودی رێزدار نێچیرڤان بارزانی، سەرۆکی ئەنجوومەنی وەزیرانی حکومەتی هەرێمی کوردستان لە هەوڵی بەردەوامدا بوون لە پەرلەمانی ئەوروپا لەپێناو دەستنیشانکردنی نادیە موراد و لەمیعە بەشار بۆ ئەو خەڵاتە گەورەیە".
ئاژگەیی جگە لە بایەخە مۆراڵییەکەی ساخارۆڤ، ئەوەی بە دەستکەوتێکی گەورە بۆ دیپلۆماسی و لۆبی کورد لە ئەوروپا گێڕایەوە.