زیلینسکی: رووسیا بە15 درۆنی ئێرانی ئۆدێسای کردە ئامانج
رووداو دیجیتاڵ
سەرۆکی ئۆکراینا رایگەیاند، شەوی رابردوو بە درۆنی ئێرانی هێرشکراوەتە سەر شاری ئۆدێسا لە باشووری وڵاتەکەی، بەوهۆیەوە کارەبای 1.5 ملیۆن کەس بڕاوە.
ئێوارەی رۆژی شەممە 10ـی کانوونی یەکەمی 2022، ڤۆلۆدیمیر زیلینسکی، سەرۆکی ئۆکراینا لە گرتەیەکی ڤیدیۆییدا لە کیێڤی پایتەختی وڵاتەکەی گوتی: "بارودۆخی ئۆدێسا زۆر قورسە. دوای بۆردوومانی شەو لە رێگەی درۆنی ئێرانییەوە، کارەبای ئۆدێسا و شار و گوندەکانی دیکەی ناوچەکە بڕاوە."
زیلینسکی گوتیشی کە 1.5 ملیۆن کەس لە هەرێمی ئۆدێسا بەهۆی هێرشە درۆنییەکانەوە بەبێ کارەبا بوون و دەڵێت، "زۆر قورسە کارەبایان بۆ دابینبکەین."
بە گوتەی سەرۆکی ئۆکراینا، هێزەکانی رووسیا لە بۆردوومانەکەدا 15 درۆنی شاهدی ئێرانییان بەکارهێناوە. گوتیشی کە "ئەمە هەڵسوکەوتی رووسیایە" بەرامبەر بە ئۆدێسا و دانیشتووانەکەی.
جگە لەوەش زیلینکسی سوپاسی نەرویجی کرد بەرامبەر بەو پاکێجە 100 ملیۆن دۆلارەی وەکو هاوکاری پێیدەبەخشێت و گوتی، لە ئاوەدانکردنەوەی ژێرخانی وزە خەرجی دەکەن "کە بەهۆی هێرشەکانی رووسیاوە تێکشکاوە."