ژنێک بە سكێک 10 منداڵی دەبێت و ریکۆردی جیهانیی گینس دەشکێنێت

 

 

گۆوشایمێ سامارا سیتهۆڵ ئەو ژنەی ئەفریقیای باشوورە کە 10 منداڵی بووە، ئەو تەمەنی 37 ساڵە و هاوژینەکەی دەڵێت، تووشی سەرسوڕمان بوون کاتێک 10 منداڵیان بووە، چونکە لە پشکنینەکاندا هەشت کەس لە سکی هاوژینەکەیدا دەرکەوتووە.

 

تێبۆهۆ سۆتێتسی، هاوژینی گۆوشایمێ بە میدیاکانی راگەیاندووە، منداڵەکانیان حەوت کوڕ و سێ کچن "دڵخۆشم. کەسێکی سۆزدارم و ناتوانم زۆر قسە بکەم".

 

بەرپرسێکی ئەو وڵاتە لەدایکبوونی ئەو 10 منداڵەی بە یەک سک بۆ بی بی سی پشتڕاستکردووەتەوە و بەرپرسێکی دیکەش دەڵێت، دەبێت بچن منداڵەکان ببینن و ئەوە پشتڕاست بکەنەوە.

 

ئەندامێکی خێزانەکە کە نەیویستووە ناوی ئاشکرا بکرێت، بە بی بی سیی راگەیاندووە، ئەو ژنە 10 منداڵی بووە، پێنجیان بەشێوەی سرووشتی و پێنجیشیان لەڕێگەی نەشتەرگەرییەوە.

 

گۆوشایمێ سامارا سیتهۆڵ پێشتر دووانەیەکی بووە و ئێستا تەمەنیان شەش ساڵە، بەو پێیەش بێت ئێستا 12 منداڵی هەیە. دەگوترێت، ئێستا تەندروستیی باش و جێگیرە. ئەو ژنە بە میدیاکانی گوتووە، سەرەتای دووگیانبوونی ناخۆش بووە و هەمیشە نزای ئەوەی کردووە کە بەشێوەیەکی تەندروست منداڵی ببێت، چەندین شەویش بەهۆی نیگەرانییەوە خەوی لێنەکەوتووە.

 

ریکۆردی جیهانیی گینس بەو کەناڵە بەریتانییەی راگەیاندووە، لێکۆڵینەوە لەو کەیسە دەکەن. پێشتر ژنێکی ئەمریکی لە ساڵی 2009 بە سکێک هەشت منداڵی بووە و ناوی چووەتە کتێبی گینسەوە بۆ پێوانە جیهانییەکان، بەوەی بە یەک جار ئەو ژمارە زۆرە لە منداڵی خستبێتەوە.

 

مانگی پێشوو، ژنێک بەناوی حەلیمە سیسای، تەمەن 25 ساڵ، لە وڵاتی مالی نۆ منداڵی بە سکێک بوو.