ژمارەیەک هاونیشتمانی: سێ کاژێرە لە فڕۆکەخانەیەکی بولگاریا راگیراوین

 

 

فڕۆکەکە کاژێر 02:30ی دوای نیوەڕۆی هەینی 9ی ئاب لە هەولێرەوە دەستی بە گەشتەکەی کردووە. هاونیشتمانییەک بەناوی شەهرام لە سەرنشینانی فڕۆکەکەیە و بە تۆڕی میدیایی رووداوی گوت، "ترانزێتمان لە فڕۆکەخانەیەکی بولگاریا هەبوو، ماوەکە 45 خولەک بوو، بەڵام نەبراینە ئەو فڕۆکەخانەیە و لە فڕۆکەخانەی سۆفیا پایتەخت فڕۆکەکەمان نیشتەوە."

 

شەهرام گوتی، "زیاتر لە سێ کاژێرە راگیراوین و رێگەمان نادرێت لە فڕۆکەکە بۆ چا خواردنەوەیەکیش بچینە خوارەوە."

 

بەگوێرەی ئەو دیمەنانەی لەنێو فڕۆکەکەوە بۆ رووداو نێردراون، لەنێو سەرنشینەکاندا ژن و منداڵیش هەن.

 

شوان سەرنشینێکی دیکەی فڕۆکەکەیە و بە رووداوی گوت، زیاتر لە 3 کاژێرە راگیراون و پێیان دەڵێن چاوەڕوان بن؛ گوتیشی، "سەرنشینمان تێدایە تەندروستی باش نییە و ناکرێت لەوە زیاتر لە فڕۆکەکەدا بمنێنێتەوە."