کرێملن: پووتین و پزیشکیان جەختیان لە پشتیوانیکردنی سووریا کردەوە

 

بەگوێرەی راگەیێندراوەکە ڤلادیمیر پووتین، سەرۆکی رووسیا و مەسعود پزیشکیان، سەرۆککۆماری ئێران هەروەها باسیان لە گرنگیی هاوئاهەنگیکردن لە چوارچێوەی گفتوگۆی ئەستانە بە بەشداریی تورکیا کردووە.

 

لە لایەکی دیکەوە، ئەکادیمیست، دیپلۆمات و پسپۆڕانی سەربازیی رووسیا لە دیبەیتێکدا باس لە لایەنی تێکدەری تورکیا لە ناوچەکە دەکەن و دروستبوونی گرژی سەربازیش بە دوور نازانن.

 

بۆریس دۆگڵۆڤ، پسپۆڕ و ئەکادیمستی رۆژهەڵاتی نێوەڕاست دەڵێت، "پسپۆڕانی رووسیا ئاماژە بەوە دەکەن، لە دۆخی ئەمڕۆدا هەوڵە سەربازییەکان بۆ ئارامکردنەوەی رەوشی سووریا زۆر کەمن، دەبێت سووریا هەنگاوی گەورە بنێت و ئۆتۆنۆمی کوردەکان قبووڵ بکات".

 

گریگۆری لوکیانۆڤ، پسپۆڕی پەیوەندییە نێودەوڵەتییەکانیش لەو بارەیەوە دەڵێت، "رووسیا لە لایەک لە رووی دیپلۆماسییەوە لەگەڵ لایەنە پەیوەندیدارەکانی وەکو ئێران و تورکیا لەسەر پرسەکە گفتوگۆ دەکات و لەلایەکی دیکەوە، بە فڕۆکەی جەنگی پشتیوانی لە سوپای سووریا دەکات".

 

ئەمە لەکاتێکدایە، لە 27ـی ئەم مانگەوە، رەوشی سووریا ئاڵۆزتر بووە. ئەمەش دوای ئەوەی هێزە چەکدارەکانی دەستەی تەحریری شام و هاوپەیمانەکانی دەستیان بە هێرشکردنە سەر ناوچەکانی ژێر دەسەڵاتی حکومەتی سووریا و بەتایبەتی پارێزگای حەلەب کرد.

 

بەگوێرەی سەرچاوە خۆجێییەکانی وڵاتەکە، لە ئەنجامی پێکدادانەکاندا 602 کەس کوژراون. لەنێویاندا، 299 چەکداری سەر بە هێزە ئۆپۆزیسیۆنەکان، 199 سەربازی سوپای سووریا و 104 کەسی سڤیل هەن.