ئەمریکا و چین یەکدی بە بڵاوکردنەوەی "زانیاریی چەواشەکارانە" تۆمەتباردەکەن

 

وەزارەتی دەرەوەی ئەمریکا لە نوێترین راپۆرتی خۆیدا چین بە بڵاوکردنەوەی زانیاریی چەواشەکارانە تۆمەتباردەکات، دەڵێت، پەکین لە رێگەی سانسۆرکردن، بڵاوکردنەوەی زانیاریی نادروست و کڕینی پلاتفۆرمی هەواڵی، میدیای جیهانی شێواندووە کە ئەمەش پێچەوانەی ئازادیی رادەربڕینە.

 

جەیمس روبین، نێردە و هاوئاهەنگیکاری تایبەتی سەنتەری پەیوەندیی جیهانی لە وەزارەتی دەرەوەی ئەمریکا ئاماژە بەوە دەکات، "تێڕوانینێکی گشتگیرە کە چۆن کۆماری گەلی چین و پارتی کۆمیۆنیستی چین لەپێناو بەرەوپێشبردنی ئامانجە جیۆپۆلەتیکییەکانی، هەوڵی شێواندن لە بواری زانیاریی جیهانی دەدات."

 

وەزارەتی دەرەوەی چین تۆمەتەکانی ئەمریکای رەتکردەوە و گوتی، تۆمەتبارکردنی چین بە بڵاوکردنەوەی "زانیاریی چەواشەکارانە" خۆی "چەواشەکارییە."

 

وانگ وینبین، گوتەبێژی وەزارەتی کاروباری دەرەوەی چین دەڵێت، "داوا لە لایەنی ئەمریکی دەکەین دەستبەجێ ناوزڕاندن و تۆمەتبارکردنی چین بوەستێنێت و بەناوی مافەکانی مرۆڤەوە دەستوەردان لە کاروباری ناوخۆیی چین بوەستێنێت."

 

ئەمریکا هەڵمەتێکی گەورەی لە دژی چین لەسەر تۆڕە کۆمەڵاتییەکانی دەستپێکردووە، لە 2019ـەوە کۆمپانیای مێتا بەتەنیا 7,704 هەژمار و 954 پەیج و 15 گرووپ و 15 هەژماری ئینستاگرامی داخستوون کە گوایە بەشێکن لەو ملیاران دۆلارەی چین خەرجی کردووە بۆ داڕشتنەوەی "ژینگەی زانیاری لەسەر ئاستی جیهان."

 

چین بەتەنیا بە رەتکردنەوەی تۆمەتەکان نەوەستا، دەستوەردانی ئەمریکای لە عێراق و سووریا وەبیرهێنایەوە و جارێکی دیکە پێشێلکردن و چەوساندنەوەی کەمینە موسڵمانەکانی ئۆیگۆری رەتکردەوە و ئەمریکاشی بە "ئیمپراتۆری درۆ" وەسفکرد.